"Neftchi" - "Bunyodkor" (1:2) bahsidan so‘ng o‘tkazilgan matbuot anjumanida farg‘onaliklar ustozi Andrey Fyodorov quyidagicha fikr bildirdi.
"Birinchi bo‘limda ko‘rsatgan o‘yinimizni futbol deb atashim qiyin. Bu futbol emas. Chunki xar taraflama raqib bizdan ustun keldi. Bu holatni nima bilan bog‘liq ekanligini hozir izohlab bera olmayman. Ruhiy jihatdan o‘yinlarga to‘liq tayyor bo‘la olmayapmiz. Bu borada qancha ishlamaylik ijobiy o‘zgarish kuzatilmayapti. O‘tgan yilning so‘nggidagi mag‘lubiyatli natijalar va bu yilgi muvaffaqiyatsizliklarga men javobgarman. Aslida Farg‘ona klubining imkoniyatlari yomon emas. Biroq mashg‘ulotlardagi jamoani rasmiy o‘yinlarda umuman tanib bo‘lmay qolyapti. Deyarli yarim jamoa futbol o‘ynashni unutib qo‘ygandek tasavvur uyg‘otmoqda. Xozirgi holatda jamoani ruhlantirib yuboradigan qandaydir jiddiy chora ko‘rish kerak. O‘yin tugashiga 20 daqiqa qolganda bir qarorga keldim. Agar mening jamoadan ketishim "Neftchi"ning keyingi natijalariga ijobiy ta’sir o‘tkazsa men bu qarorni qabul qilaman va bunga tayyorman" - dedi Fyodorov
