Osiyo chempionlar ligasining 5-turi doirasida "A" guruhidagi yana bir o‘yin yakuniga yetdi. Eronning "Istiqlol" klubi o‘z maydonida BAAning "Al-Ahli" jamoasi bilan durang o‘ynadi — 1:1.
Natijada har ikkala jamoa hisobidagi ochkolar soni 8taga yetdi. "At-Ta’vun" va "Lokomotiv" esa 5 ochkoga ega.
So‘nggi turda temiryo‘lchilar "Al-Ahli" mehmoni bo‘ladi. Ushbu o‘yindagi g‘alabagina toshkentliklarni pley-offga olib chiqadi. Jamoamizga har qanday hisobdagi g‘alaba kifoya qiladi.
"At-Ta’vun" 6-turda o‘z uyida "Istiqlol"ni qabul qiladi. Saudiyaliklarni bu bahsda faqat g‘alaba qanoatlantiradi. Aks holda "Ta’vun" keyingi bosqichga chiqa olmaydi. Jamoa "Istiqlol"ni mag‘lub etsa, "Lokomotiv" ham g‘alaba qozonsa, u holda barcha jamoalarda bir xil 8tadan ochko to‘planadi. Bunday holatda guruh bosqichidagi to‘plar nisbatiga qaraladi.
Bunday vaziyatda so‘nggi turda qo‘lga kiritiladigan kichik hisobdagi g‘alaba ham "Loko"ni nimchorak finalga olib chiqadi.
| № | Jamoa | O‘yin | G‘alaba | Durang | Mag‘lubiyat | T-N | Ochko |
|---|---|---|---|---|---|---|---|
| 1 | Istiqlol | 5 | 2 | 2 | 1 | 8-4 | 8 |
| 2 | Al-Ahli (BAA) | 5 | 2 | 2 | 1 | 6-5 | 8 |
| 3 | Lokomotiv | 5 | 1 | 2 | 2 | 7-8 | 5 |
| 4 | At-Ta’vun | 5 | 1 | 2 | 2 | 6-10 | 5 |
