Oliy liga turnir jadvalida peshqadamlik qilayotgan "Lokomotiv" 6 ta o‘yinda 13 bor gol urishga muvaffaq bo‘ldi. Mana shu 13 goldan yettitasi Marat Bikmayevga tegishli.

Bikmayev ko‘z tegmasin, bu yil yaxshi mavsumni o‘tkazyapti. U Osiyo chempionlar ligasida hozircha beshta gol urishga muvaffaq bo‘ldi. Bikmayev oliy ligada "Mash’al", "So‘g‘diyona", "Olmaliq" darvozasiga bittadan, "Nasaf" bilan "Paxtakor"ga esa ikkitadan to‘p kiritdi.

U shuningdek, OCHLda "Al Ahli" va "Istiqlol" darvozasini bir martadan ishg‘ol qilgan bo‘lsa, "Al Taavon" bilan kechgan o‘yinda uchta gol urib tur qahramonlaridan biri bo‘ldi va natijada OFK tomonidan tuziladigan tur ramziy terma jamoasiga kiritildi.

"Lokomotiv" ertaga, 29 aprel kuni o‘z maydonida "Obod"ga qarshi bahs olib boradi. Bu o‘yinda ham Bikmayevdan gollar kutib qolamiz.