Oliy liga 8-turidan o‘rin olgan "Paxtakor" - "Navbahor" (1:0) o‘yinidan keyin mezbonlar ustozi Jasur Abduraimov o‘z fikrlarini aytdi.
"Birinchi navbatda stadionga kelgan ishqibozlarni tabriklashni xohlayman. O‘yinchilardan minnatdorman, ular bugun g‘alaba uchun 150 foiz imkoniyatlarini ishga solishdi. Uchrashuvga qo‘ygan vazifani bajardik - g‘alaba qozondik. "Paxtakor" o‘zbek futbolining bayroqdor jamoasi sanaladi. Yigitlar o‘zlariga ishonchni his qilishdi. Bu holat davom etadi deb umid qilaman. Bugun yosh darvozabon Shohrux Raimov uchun juda xursand bo‘ldim. Oliy ligada debyut qildi va bellashuvni xatosiz o‘tkazdi. Qiyin bellashuvda saviyasini ko‘rsatdi. Yosh o‘yinchilarga ishonishda davom etamiz. Moslashish uchun ularga vaqt kerak, ammo kattalar futboliga ko‘nika olishadi deb o‘ylayman. Xushnud Avilov ham juda yaxshi o‘yin namoyish qildi. U kabi o‘yinchilar futbolimiz kelajagidir. Ba’zi jarohatlangan futbolchilar tiklanib bo‘lgandan keyin jamoaga yordam berishadi. Hali hammasi oldinda va "Paxtakor" faol kurashda" - dedi Abduraimov.
