Oliy liga 8-turidan o‘rin olgan «Neftchi» - «Olmaliq» (1:1) bahsidan so‘ng, mezbonlar katta murabbiyi Murod Ismoilov jurnalistlarning savollariga javob berdi.

«Olmaliq» - yaxshi jamoa. Bugun ular bizda yaxshi taassurot qoldirishdi. Olmaliqliklar himoya chizig‘ida tartibli o‘yin namoyish etishdi. Standartlarga ham ko‘p urg‘u berishdi. Aynan yon chiziqdan to‘p tashlab berilgan vaziyatda bizning darvozamizni ishg‘ol etishdi. Bevosita o‘zimizning o‘yinimiz haqida gapiradigan bo‘lsam, bugun yigitlar to‘pni nazorat qilish borasida raqibdan ustunlikka erishishdi. Darvozalarga berilgan zarbalar borasida ham shunday fikr bildirib o‘tish mumkin. Mazkur o‘yinda ko‘proq hujumga e’tibor qildik. Lekin jismoniy tarafdan "Olmaliq" futbolchilari o‘z ustunliklarini ko‘rsatishdi. Ijobiy tomoni, yigitlar mag‘lubiyat bilan yakunlanayotgan o‘yin natijasini o‘zgartirishga erishishdi. Afsuski, g‘alaba qozona olmadik. Endi navbatdagi bahslarga e’tibor qaratamiz.

Ketma-ket mag‘lubiyatlar baribir futbolchilarga o‘z ta’sirini o‘tkazyapti. Ruhiy tarafdan ularga dalda berishga harakat qilyapmiz. Biroq ko‘p narsa ularning o‘zlariga bog‘liq. Biz yaxshi saviyadagi futbolchilarni yiqqanmiz. Men ularni mahoratiga shubha qilmayman. Ayni paytdagi eng muhim vazifamiz futbolchilarni o‘zlariga bo‘lgan ishonchini qaytarishdir» - dedi Murod Ismoilov.