"Real" hujumchisi Krishtianu Ronaldu Yevropa chempionlar ligasining yarim final bosqichida bo‘lib o‘tgan "Atletiko"ga qarshi o‘yinda 3ta gol urdi.
"Real" klubi rasmiy sayti portugaliyalik futbolchini "qaymoqranglilar" safida 400ta gol urgani bilan tabrikladi. "Qirollik klubi" prezidenti Florentino Peres Krishtianu Ronalduga 400 raqami tushirilgan esdalik futbolkani sovg‘a qildi.
"Real" saytida berilgan ma’lumotga ko‘ra, Ronaldu Ispaniya La ligasi doirasida 281ta, Chempionlar ligasida 88ta, Ispaniya kubogida 22ta, klublar o‘rtasidagi JCHda 4ta, UYEFA superkubogida 2ta va Ispaniya superkubogida 3ta gol urishga muvaffaq bo‘lgan.
Ammo rasmiy statistika biroz boshqacha. "Atletiko" bilan o‘yindagi xet-trikdan keyin Krishtianu hisobida 399ta gol bor. Gap shundaki, 2010 yilda Ronaldu yo‘llagan jarima zarbasidan keyin to‘p Pepega tegib, "Real Sosyedad" darvozasidan o‘rin olgan. Bu gol rasman Pepe hisobiga yozilgan. Ammo "Real" bu golni Krishtianu Ronaldu urgan deb hisoblaydi.
Demak, rasmiy ma’lumotga ko‘ra, portugaliyalik futbolchining "Madrid" safida urgan gollari soni hozircha 399ta.
