Futbol bo‘yicha O‘zbekiston Oliy ligasining 11-turidan o‘rin olgan «Buxoro» — «Navbahor» o‘yinida maydondan chetlatilgan Oybek Qilichev, 25 may kuni oila qurdi. Bu haqda «Navbahor» klubi matbuot xizmati xabar berdi.

«Buxoro»ga qarshi 3:3 hisobida yakuniga yetgan o‘yinning 83-daqiqasida bosh hakam bir yo‘la ikki futbolchi — Ergash Ismoilov hamda Oybek Qilichevni maydondan chetlatgandi. Keyinroq vaziyatni o‘rganib chiqqan PFL «Navbahor» futbolchisi Oybek Qilichevni ikki o‘yinga diskvalifikasiya qildi hamda moddiy jarimaga tortdi. Bunda moddiy jarimaning miqdori ko‘rsatilmadi. Oybek Qilichev raqibining yuziga urgani uchun maydondan chetlatildi, deb yozgandi PFL matbuot xizmati. Shundan kelib chiqib, tashkilot jabrlanuvchi Ergash Ismoilovni qo‘shimcha jazolab o‘tirgani yo‘q.

Shu tariqa 18 may kuni qizil olgan Oybek Qilichev 27 may kuni bo‘lib o‘tadigan «Bunyodkor»ga qarshi 12-tur va 31 may kuni bo‘lib o‘tadigan «Neftchi»ga qarshi O‘zbekiston kubogining javob o‘yinida maydonga tushmaydigan bo‘ldi. 25 may kuni esa futbolchining o‘zi oila qurdi. Bunda Oybek Qilichev qizil kartochkani qasddan tilab olganmidi yoki bu vaziyat taqazosimi — oydinlik kiritilmagan.

«Buxoro»ga qarshi bellashuvni boshqarib borgan andijonlik hakam Temur To‘xtasinov «Navbahor» darvozasiga 3 ta penalti tayin qilgani, tanaffus vaqtida esa har ikki klub bosh murabbiylarini maydondan chetlatgani inobatga olinsa, Qilichev asabiylashgan bo‘lishi ham mumkin.

Nima bo‘lgan taqdirda ham, yosh kuyov kamida bir hafta davomida futboldan chetda bo‘lish imkoniyatini qo‘lga kiritdi. Shu bilan Qilichev 14 iyun kuni bo‘lib o‘tadigan Oliy liga 13-turida maydonga tushish imkoniyatiga ega.