Bugun “Nasaf” PFK bosh menejeri Shamil Yarullin bir guruh faol muxlislar bilan yuzma-yuz muloqot o‘tkazdi.
Muloqot rekonstruksiya ishlari nihoyasiga yetayotgan, yangi ko‘rinishdagi “Markaziy” stadionda bo‘lib o‘tdi. Yarullin yig‘ilganlarga stadionda olib borilgan keng ko‘lamdagi rekonstruksiya ishlari va bu orqali yaratilgan o‘zgarishlar, hamda kelgusida amalga oshiriladigan ishlar haqida ham ma’lumot berdi. Muloqot ochiq va samimiy ruhda o‘tdi.
Muloqot davomida muxlislarning stadionda o‘zlarini tutish tartib-qoidalari, bu haqda OFK talablari ham ularga yana bir marta tushuntirildi.
"Qo‘qon-1912" jamoasi bilan bo‘ladigan, O‘zbekiston Kubogining 1/4 finali dastlabki uchrashuvi, 30 iyun kuni "Markaziy" stadionda bo‘lib o‘tishi rasman e’lon qilindi. Yarullin ushbu o‘yinni o‘tkazish bo‘yicha olib borilayotgan tayyorgarliklar haqida ham ma’lumot berib o‘tdi.
Shundan so‘ng, klub rahbari, muxlislarni qiziqtirgan ko‘plab savollarga ham javob berdi.
