Oliy liga 14-turidan o‘rin olgan «Navbahor» - «Olmaliq» (1:1) o‘yinidan so‘ng, mehmonlar ustozi o‘z fikrlari bilan o‘rtoqlashdi.

Ilhom Mo‘minjonov (“Navbahor” jamoasi bosh murabbiyi): - Jamoamiz oltita turdan beri g‘alaba qozona olmayotganligi sababli, “Olmaliq” bilan o‘tgan o‘yinda g‘alabani qo‘lga kiritishimiz shart edi. Bugun g‘alabaga yaqin edik. Ammo, so‘nggi daqiqalarda yutuqni qo‘ldan boy berdik. Uchrashuvga jiddiy tarzda hozirlik ko‘rgandik. Afsuski bahs oxirlarida o‘tkazib yuborilgan gol barcha mehnatlarimizni chippakka chiqardi. Nima ham qila olardik, ko‘zlangan maqsadga erisha olmagan bo‘lsakda hayot davom etadi. Shundan kelib chiqqan holda navbatdagi uchrashuvga tayyorgarlik ko‘ramiz. Bir turdan keyin chempionatning dastlabki qismi yakuniga yetadi. Davralar oralig‘ida birinchi davrada yo‘l qo‘yilgan xato va kamchiliklarni tahlil qilib ularni bartaraf etgan holda ikkinchi davraga munosib tarzda hozirlik ko‘ramiz. Bu orqali mavsumni kuchli beshlikda yakunlash uchun harakat qilamiz. Bugun birinchi davra hisobidan o‘z maydonimizdagi so‘nggi bahsni o‘tkazdik. Shukurki, uydagi uchrashuvlarda raqiblarimizga imkoniyatni boy bermadik. Ikkinchi davrada yanada yaxshiroq harakat qilib, muxlislarimizni chiroyli o‘yinlarimiz bilan xursand qilishni maqsad qilganmiz. Ikkinchi davrada jamoada yangi futbolchilarni ko‘rishni istayman. O‘zim istagan futbolchilar bilan muzokaralar o‘tkazdik. Davralar oralig‘ida tarkibga ichki chempionatda to‘p surayotgan olti-etti nafar yosh futbolchilarni qo‘shishni mo‘ljallab turibman. Hozircha ularni kim ekanligi sir. Barcha masalada kelishuvga erishganimizdan so‘ng ularni kimligini oshkor qilamiz.

Ayni paytda besh nafar futbolchimiz turli sabablarga ko‘ra bugungi uchrashuvda ishtirok eta olishmadi. Ularning ayrimlari oilaviy sabab, ba’zilari esa betobligi sababli ayni paytda jamoa bilan birga emas. Birinchi davrani tugashiga yana bitta o‘yin qoldi. “Nasaf” bilan o‘tadigan uchrashuvdan keyin tarkibda kimlarni qolishi va kimlarga javob berilishi borasida bir to‘xtamga kelamiz.