“Neftchi” – “Bunyodkor” uchrashuvidan keyingi matbuot anjumanining birinchi qismida “qaldirg‘ochlar” ustozi ishtirok etdi.

- G‘alaba qozonganimizdan xursandman. Biroq o‘yin borasida iliq fikrlardan tashqari qoniqmagan jihatlarim ham bo‘ldi. Birinchi bo‘limda yaxshi o‘yin ko‘rsatdik. To‘pni o‘zimizda nazorat qilib, chiroyli kombinasion hujumlar tashkil etdik. “Neftchi” darvozasi oldida bir qator xavfli vaziyatlar yaratdik. Birgina Eldor Shomurodovning o‘zi birinchi bo‘lim mobaynida uchta gol urishi mumkin edi. Biroq hujumchimiz vaziyatlardan foydalanishda aniq o‘ynay olmayapti. Umuman bu jihat boshqa futbolchilarda ham yaxshi emas. Bu borada ishlaymiz. Eng muhimi vaziyatlar yaratayotganimiz. Ikkinchi bo‘limda biroz bo‘shashdik, natijada “Neftchi” futbolchilari jonlanib qolishdi. Farg‘ona jamoasi ham xuddi biz kabi holatda, deb o‘ylayman. Davralar oralig‘ida jamoa o‘z tarkibini kuchaytirib, yaxshi natijalar qayd etishiga tilakdoshman, - deydi Mirjalol Qosimov.