Kecha, 30 iyun kuni to‘liq rekonstruksiyadan chiqqan va butunlay yangilangan “Markaziy” stadionining tantanali ochilish marosimi bo‘lib o‘tdi. Bu haqda "Nasaf" klubi matbuot xizmati xabar bermoqda.

Marosimda viloyat hokimi, viloyat futbol federasiyasining prezidenti Zafar Ro‘ziyev ishtirok etdi va nutq so‘zladi. Ro‘ziyev o‘z chiqishida, hozirgi paytda davlatimiz rahbari tomonidan olib borilayotgan bunyodkorlik ishlari hamda u kishining bevosita e’tibori tufayli mana shunday chiroyli stadionlar, sport inshootlari barpo etilayotgani to‘g‘risida to‘xtalib o‘tdi. Viloyat hokimi shuningdek stadionning rekonstruksiya ishlarida jonbozlik ko‘rsatgan, klub bosh homiysi “Sho‘rtan gaz kimyo majmuasi” rahbariyatiga hamda muhandis, quruvchilarga ham hokimlik tomonidan minnatdorchilik izhor etdi.

Shundan so‘ng, shu yili Jizzax shahrida bo‘lib o‘tgan “Barkamol avlod -2017” sport o‘yinlarida g‘oliblikni qo‘lga kiritgan viloyatning bir qator yosh sportchilari hokimlik tomonidan munosib taqirlandi. Ularga esdalik sovg‘alari topshirildi.

“Nasaf” jamoasining bosh murabbiyi Ro‘ziqul Berdiyev o‘tgan 2016 yilgi futbol mavsumi bo‘yicha yilning eng yaxshi murabbiyi sifatida e’tirof etilgan edi. Viloyat hokimi jamoa ustoziga ham diplom va esdalik sovg‘asi topshirdi.

Tantanali marosim kuy va qo‘shiqlarga ulanib ketdi. Tomoshabinlar viloyatning bir guruh san’atkorlari va taniqli estrada yulduzi Davron G‘oyipov ishtirokidagi konsert dasturini tomosha qilishdi.