Hujumkor yarimhimoyachi Husniddin G‘ofurov faoliyatini Serbiyaning boshqa bir klubi «Mladost Luchani»da davom ettiradi.

Hamyurtimiz 2013 yildan buyon ushbu mamlakatning «Yavor» jamoasi sharafini himoya qilib kelayotgandi.

To‘rt yillik faoliyatdan so‘ng Husniddin jamoasini va shu bilan birga muhitni o‘zgartirishga qaror qildi. O‘z vaqtida O‘zbekiston milliy terma jamoasiga taklif etilgan futbolchi o‘tgan hafta «Mladost Luchani» klubi bilan ikki yillik shartnoma imzoladi.

E’tiborlisi, bu jamoa «ko‘hna qit’a»da nufuzi jihatidan ikkinchi o‘rinda turuvchi Yevropa Ligasida ishtirok etadi. Kuni kecha tashlangan qur’aga ko‘ra, «Mladost» turnirning ilk saralash bosqichida Ozarbayjonning «Inter» klubi bilan to‘qnash keladi.

Jamoalar o‘rtasidagi ilk o‘yin 29 iyun kuni bo‘lib o‘tadi. Legioner futbolchimiz allaqachon yangi jamoasi tarkibida mashg‘ulotlarni boshlab yuborgan. Biz Husniddin G‘ofurov bilan bog‘lanib, undan intervyu oldik.

- Husniddin, «Yavor»da 4 yil o‘ynadingiz. Shu jihatdan olib qarasak, klubdan ketish oson bo‘lmagandir?

- Ha, albatta. Bu qarorga kelish men uchun juda ham qiyin bo‘ldi. Lekin bu hayot. Ba’zida kutilmagan qarorlar ham qabul qilib turish kerak.

- Ketishingizga nima sabab bo‘ldi?

- «Yavor» bilan imzolagan shartnomam yakuniga yetgandi. Erkin agentga aylanganim uchun bu transfer oson amalga oshdi.

- Jamoada qolishingiz ham mumkinmidi?

- Albatta. Menga shartnomani uzaytirish taklifi ham berilgandi. Lekin barchasini o‘ylab ko‘rgach, ketishga qaror qildim. O‘zimni boshqa jamoada ham sinab ko‘rish istagi ustun chiqdi.

- Muhitni o‘zgartiray debsizda?

- Xuddi shunday. «Mladost»dan tushgan taklifni rad eta olmasdim. Chunki Yevropa Ligasida o‘ynash imkoniyati yuzaga kelgandi.

- Umuman, bu taklif qanday paydo bo‘ldi?

- «Mladost Luchani» klubi bosh murabbiyi Nenad Milovanovichning o‘zi menga qo‘ng‘iroq qilib, jamoaga taklif qildi. Taklifni ko‘rib chiqib, javobini aytishimni so‘radi. Ko‘p ham o‘ylamay, taklifga ijobiy javob qaytardim.

- «Yavor» siz bilan to‘liq hisob-kitob ishlarini amalga oshirdimi?

- Ha, do‘stona ruhda xayrlashdik.

- Maoshingizni to‘liq oldingizmi?

- Maosh va mukofot pullarini to‘liq olganman. Bu borada hech qanday muammo yo‘q. Yevropada bunday muammolarga duch kelmaysiz.

- «Yavor»da o‘tkazgan 4 yilingizdan qanday umumiy taassurotlar qoldi?

- Faqat ijobiy. Men uchun ajoyib va unutilmas yillar bo‘ldi.

- Yevropada futbolchi sifatida o‘sishga erishdim, deb hisoblaysizmi?

- Bu yerda juda ko‘p narsa o‘rgandim. Futbolga qarashim ham o‘zgardi. «Yavor»da o‘tgan yillarimdan afsuslanmayman.

- Yangi jamoangiz bilan qancha muddatga shartnoma imzoladingiz?

- Ikki yillik shartnoma imzoladim. Agar hammasi joyida bo‘lsa, kelishuvni yana uzaytirishim ham mumkin.

- Tanishtiruv marosimi qachonga belgilangan? Yangi klubingizda raqam tanladingizmi?

- Tanishtiruv marosimi Yevropa Ligasi o‘yinidan oldin o‘tkaziladi. «Mladost»da 10-raqam ostida to‘p suraman.

- Bosh murabbiy bilan gaplashib oldingizmi? Yangi klubingizda ham o‘z pozisiyangizda o‘ynar ekansizmi?

- Gaplashib oldik. Murabbiy meni chap va o‘ng qanot yarim himoyasida o‘ynatmoqchi. Ya’ni, o‘zimning pozisiyamda harakat qilaman. Hujumchilarga yaqindan yordam beraman.

- Moliyaviy tomondan berilgan taklif «Yavor»dagidan yaxshiroqmi?

- Ha, nisbatan olganda yaxshiroq. Har tomonlama menga qulay taklif berishdi. Bundan xursandman.

- Alohida uy berishdimi?

- Ayni payt boshqa shaharda yig‘in o‘tkazyapmiz. Qaytganimizdan so‘ng yangi uyga ko‘chib o‘taman.

- Tanaffus vaqtida O‘zbekistonga keldingizmi?

- Mavsum yakunlanishi bilan ona Vatanga qaytgandim. Oila a’zolarim davrasida ta’tilni maroqli o‘tkazdim.

- Qaysi o‘yinni bevosita stadiondan tomosha qildingiz?

- Olmaliq shahrida o‘tkazilgan O‘zbekiston va Rossiya yoshlar terma jamoalari o‘rtasidagi o‘yinni stadiondan kuzatdim. Boshqa uchrashuvlarni ko‘ra olmadim.