Ҳужумкор яримҳимоячи Ҳусниддин Ғофуров фаолиятини Сербиянинг бошқа бир клуби «Младост Лучани»да давом эттиради.

Ҳамюртимиз 2013 йилдан буён ушбу мамлакатнинг «Явор» жамоаси шарафини ҳимоя қилиб келаётганди.

Тўрт йиллик фаолиятдан сўнг Ҳусниддин жамоасини ва шу билан бирга муҳитни ўзгартиришга қарор қилди. Ўз вақтида Ўзбекистон миллий терма жамоасига таклиф этилган футболчи ўтган ҳафта «Младост Лучани» клуби билан икки йиллик шартнома имзолади.

Эътиборлиси, бу жамоа «кўҳна қитъа»да нуфузи жиҳатидан иккинчи ўринда турувчи Европа Лигасида иштирок этади. Куни кеча ташланган қуръага кўра, «Младост» турнирнинг илк саралаш босқичида Озарбайжоннинг «Интер» клуби билан тўқнаш келади.

Жамоалар ўртасидаги илк ўйин 29 июнь куни бўлиб ўтади. Легионер футболчимиз аллақачон янги жамоаси таркибида машғулотларни бошлаб юборган. Биз Ҳусниддин Ғофуров билан боғланиб, ундан интервью олдик.

- Ҳусниддин, «Явор»да 4 йил ўйнадингиз. Шу жиҳатдан олиб қарасак, клубдан кетиш осон бўлмагандир?

- Ҳа, албатта. Бу қарорга келиш мен учун жуда ҳам қийин бўлди. Лекин бу ҳаёт. Баъзида кутилмаган қарорлар ҳам қабул қилиб туриш керак.

- Кетишингизга нима сабаб бўлди?

- «Явор» билан имзолаган шартномам якунига етганди. Эркин агентга айланганим учун бу трансфер осон амалга ошди.

- Жамоада қолишингиз ҳам мумкинмиди?

- Албатта. Менга шартномани узайтириш таклифи ҳам берилганди. Лекин барчасини ўйлаб кўргач, кетишга қарор қилдим. Ўзимни бошқа жамоада ҳам синаб кўриш истаги устун чиқди.

- Муҳитни ўзгартирай дебсизда?

- Худди шундай. «Младост»дан тушган таклифни рад эта олмасдим. Чунки Европа Лигасида ўйнаш имконияти юзага келганди.

- Умуман, бу таклиф қандай пайдо бўлди?

- «Младост Лучани» клуби бош мураббийи Ненад Миловановичнинг ўзи менга қўнғироқ қилиб, жамоага таклиф қилди. Таклифни кўриб чиқиб, жавобини айтишимни сўради. Кўп ҳам ўйламай, таклифга ижобий жавоб қайтардим.

- «Явор» сиз билан тўлиқ ҳисоб-китоб ишларини амалга оширдими?

- Ҳа, дўстона руҳда хайрлашдик.

- Маошингизни тўлиқ олдингизми?

- Маош ва мукофот пулларини тўлиқ олганман. Бу борада ҳеч қандай муаммо йўқ. Европада бундай муаммоларга дуч келмайсиз.

- «Явор»да ўтказган 4 йилингиздан қандай умумий таассуротлар қолди?

- Фақат ижобий. Мен учун ажойиб ва унутилмас йиллар бўлди.

- Европада футболчи сифатида ўсишга эришдим, деб ҳисоблайсизми?

- Бу ерда жуда кўп нарса ўргандим. Футболга қарашим ҳам ўзгарди. «Явор»да ўтган йилларимдан афсусланмайман.

- Янги жамоангиз билан қанча муддатга шартнома имзоладингиз?

- Икки йиллик шартнома имзоладим. Агар ҳаммаси жойида бўлса, келишувни яна узайтиришим ҳам мумкин.

- Таништирув маросими қачонга белгиланган? Янги клубингизда рақам танладингизми?

- Таништирув маросими Европа Лигаси ўйинидан олдин ўтказилади. «Младост»да 10-рақам остида тўп сураман.

- Бош мураббий билан гаплашиб олдингизми? Янги клубингизда ҳам ўз позициянгизда ўйнар экансизми?

- Гаплашиб олдик. Мураббий мени чап ва ўнг қанот ярим ҳимоясида ўйнатмоқчи. Яъни, ўзимнинг позициямда ҳаракат қиламан. Ҳужумчиларга яқиндан ёрдам бераман.

- Молиявий томондан берилган таклиф «Явор»дагидан яхшироқми?

- Ҳа, нисбатан олганда яхшироқ. Ҳар томонлама менга қулай таклиф беришди. Бундан хурсандман.

- Алоҳида уй беришдими?

- Айни пайт бошқа шаҳарда йиғин ўтказяпмиз. Қайтганимиздан сўнг янги уйга кўчиб ўтаман.

- Танаффус вақтида Ўзбекистонга келдингизми?

- Мавсум якунланиши билан она Ватанга қайтгандим. Оила аъзоларим даврасида таътилни мароқли ўтказдим.

- Қайси ўйинни бевосита стадиондан томоша қилдингиз?

- Олмалиқ шаҳрида ўтказилган Ўзбекистон ва Россия ёшлар терма жамоалари ўртасидаги ўйинни стадиондан кузатдим. Бошқа учрашувларни кўра олмадим.