Bugun “Nasaf” birinchi davraning qoldirilgan 3-tur uchrashuvini Toshkent shahrida “Bunyodkor” jamoasiga qarshi o‘tkazadi.

O‘yin “Bunyodkor” stadionida soat 19:00da boshlanadi. Shu paytgacha Oliy liga bahslarida 20 marotaba kuch sinashgan bu jamoalar bugun o‘zaro 21-uchrashuvda maydonga tushadilar. O‘zaro o‘yinlar tarixiga nazar tashlaydigan bo‘lsak, 9 uchrashuvda “Bunyodkor” g‘alabaga erishgan. 8 uchrashuvda kuchlar teng kelgan. “Nasaf” uch o‘yinda g‘alabaga erishgan. To‘plar farqi – 26:10 “qaldirg‘ochlar” foydasiga.

“Nasaf” so‘nggi bor Toshkentda “Bunyodkor”ni 2014 yili mag‘lub etgan. Toshkentdagi bu g‘alaba yagonaligicha qolmoqda.

Bu jamoalar Toshkentda 10 marotaba kuch sinashishgan. Shundan 1tasida “ajdarlar” g‘alabaga erishishgan. “Bunyodkor” esa Toshkentda yetti marta g‘alaba qozongan. Qolgan 2 uchrashuvda g‘olib aniqlanmagan.

Bugun sinoptiklar havo haroratini ancha yuqori bo‘lishini aytishmoqda. Bizningcha mazkur jamoalar o‘rtasidagi uchrashuvning “harorati” ham yuqori bo‘lishi turgan gap. Zero, bu uchrashuvdagi g‘alaba jamoamizning birinchi davrani 2-o‘rinda yakunlashini ta’minlaydi. “Bunyokor”ga kelsak, o‘z maydonida har doim ham ochko ulashavermaydi.

Uchrashuvni to‘g‘ridan-to‘g‘ri “Sport” kanali translyasiya qilishni rejalashtirgan.