Бугун “Насаф” биринчи давранинг қолдирилган 3-тур учрашувини Тошкент шаҳрида “Бунёдкор” жамоасига қарши ўтказади.

Ўйин “Бунёдкор” стадионида соат 19:00да бошланади. Шу пайтгача Олий лига баҳсларида 20 маротаба куч синашган бу жамоалар бугун ўзаро 21-учрашувда майдонга тушадилар. Ўзаро ўйинлар тарихига назар ташлайдиган бўлсак, 9 учрашувда “Бунёдкор” ғалабага эришган. 8 учрашувда кучлар тенг келган. “Насаф” уч ўйинда ғалабага эришган. Тўплар фарқи – 26:10 “қалдирғочлар” фойдасига.

“Насаф” сўнгги бор Тошкентда “Бунёдкор”ни 2014 йили мағлуб этган. Тошкентдаги бу ғалаба ягоналигича қолмоқда.

Бу жамоалар Тошкентда 10 маротаба куч синашишган. Шундан 1тасида “аждарлар” ғалабага эришишган. “Бунёдкор” эса Тошкентда етти марта ғалаба қозонган. Қолган 2 учрашувда ғолиб аниқланмаган.

Бугун синоптиклар ҳаво ҳароратини анча юқори бўлишини айтишмоқда. Бизнингча мазкур жамоалар ўртасидаги учрашувнинг “ҳарорати” ҳам юқори бўлиши турган гап. Зеро, бу учрашувдаги ғалаба жамоамизнинг биринчи даврани 2-ўринда якунлашини таъминлайди. “Бунёкор”га келсак, ўз майдонида ҳар доим ҳам очко улашавермайди.

Учрашувни тўғридан-тўғри “Спорт” канали трансляция қилишни режалаштирган.