Janubiy Koreya birinchi divizionida to‘p surib kelayotgan hamyurtimiz Bahodir Nasimov o‘z jamoasi - "Ansan Griners" safida "Seongnam"ga qarshi navbatdagi tur o‘yinida asosiy tarkibda maydonga tushdi.

O‘yinda hisobni 17-daqiqada ansanliklarning urugvaylik hujumchisi Raul Tarragona ochdi. O‘yinning 83-daqiqasida "Seongnam" Pak Song Honing goli evaziga oradagi muvozanatni tikladi. 1:1 hisobi o‘yin yakuniga qadar o‘zgarmadi.

O‘yinda hamyurtimiz Bahodir Nasimov asosiy tarkibda maydonga tushib, 60-daqiqada o‘z o‘rnini Han Kon Yongga bo‘shatib berdi. Ushbu durangdan keyin "Seongnam" 29 ochko bilan turnir jadvalida 6-o‘ringa joylashgan bo‘lsa, Bahodir Nasimovning jamoasi esa 18 ochko bilan 8-o‘rinda bormoqda.

21-tur nihoyasiga yetarkan ansanliklar bosh murabbiyi Li Hung Shil Nasimovga hamon ishonch bildirmoqda. Orada Bahodir jarohat olib, davolanishga ko‘p vaqt sarfladi. Hozircha uning statistikasi unchalik qoniqarli emas: 12 o‘yinda 2ta gol. Bahodir endilikda bor imkoniyatini ishga solishi va qolgan turlarda o‘zini ko‘rsatishi kerak bo‘ladi.

Otabek Yo‘ldoshev
Janubiy Koreya, Ansan