Qatarning «As-Sadd» klubi yarimhimoyachisi Xavi Ernandes butsalarini mixga iladi.

AS xabariga ko‘ra, 37 yoshli futbolchining shartnomasi 2018 yil yozida nihoyasiga yetadi va u futbolchilik faoliyatini yakunlaydi.

«Bu mening futbolchi sifatidagi so‘nggi mavsumimdir. Keyin faoliyatimni yakunlayman, biroq futbolda qolaman. Murabbiylik qilmoqchiman, ammo yashirmayman, bu boradagi bilimlarimni oshirishim shart. To‘g‘ri, uslubiyotdan xabarim bor, lekin uni amalda qo‘llashni o‘rganishim kerak» - dedi Xavi.

Xavi faoliyatini «Barselona»da boshlab, 1995-2015 yillarda uning tarkibida o‘ynagan edi. Shundan so‘ng, u Qatarga ko‘chib o‘tdi va ikki yildan buyon «As-Sadd»da o‘ynamoqda.