Vodiyda bolalar futboliga katta ahamiyat qarata boshlagan Odil Ahmedov yoshligidagi ustozi Rauf Inileevni Namanganga taklif etdi.
Inileev Namangandagi sport kollejda murabbiylarining malakasini nazorat qiladi va ularga o‘z bilimlarini berib borish bilan bir qatorda 2004 yilda tavallud topgan futbolchilar bilan faoliyat olib boradi.
Shuningdek, Rauf Talgatovich sentyabr oyida vodiyda start oladigan chempionlar ligasi musobaqasining rahbari bo‘ladi.
Eslatib o‘tamiz, Odil Ahmedov aynan Rauf Inileev qo‘l ostida O‘zbekiston milliy terma jamoasida o‘zining debyut uchrashuvini o‘tkazgan edi. O‘shanda Odil Xitoy Taypeyi terma jamoasiga qarshi asosiy tarkibda maydonga tushgan.
"Mendan doim so‘rashadi, qayerdagi ishim o‘zimga ko‘proq yoqqanini. Har safar javobim bir - internatdagi faoliyatim! 80-yillarda Respublika olimpiya zaxiralari kollejidagi faoliyatimni yorqin xotiralar bilan eslayman. Mening sinfimdan keyinchalik MTJda o‘ynaganlardan Irismetov, Pirmatov, Nazarov kabi yorqin futbolchilarni ko‘rsatishim mumkin. 18 nafar shogirdimdan 12 nafari oliy ligada faoliyat olib bordi. Bu - mening yutug‘im. Oldimda 2-3ta ish turgan bo‘lsa-da, o‘ylab o‘tirmay Ahmedovning taklifini qabul qildim. Yana bir bor bolalar futbolida faoliyat olib borib rohat olmoqchiman. Vodiy futbolining ravnaqiga o‘zimning oz bo‘lsa-da hissamni qo‘shsam xursand bo‘lardim", - deydi 2007 yil "Osiyoning eng yaxshi murabbiyi" deb topilgan Rauf Inileev.
