Yaqinda O‘zbekiston U-22 terma jamoasi safidan “Neftchi” ixtiyoriga yetib kelgan Abdujamol Isroilov ayni paytda jamoa mashg‘ulotlarida ishtirok etmoqda.

Kecha futbolchi “Qo‘qon-1912″ga (3:1) qarshi o‘rtoqlik bellashuvida maydonga tushdi va mazkur o‘yinda gol urishga ham erishdi. Bahsdan so‘ng Isroilov bilan suhbatlashdik.

– Abdujamol, birinchi o‘rinda terma jamoamiz bilan birgalikda Osiyo chempionatiga yo‘llanma olganingiz bilan tabriklayman. Turnir tafsilotlari bilan o‘rtoqlashsangiz?

– Tabrik uchun rahmat. BAAda qiziqarli turnir bo‘ldi. Shu bilan birgalikda qiyin va murakkab bellashuvlarda ishtirok etdik. Saralashda qatnashgan xar bir jamoa turnirga yuqori tayyorgarlik bilan kelgani bilinib turardi. Erishgan natijamizda murabbiylarimizning hissasi katta bo‘ldi. Ularning to‘g‘ri taktika tanlay olishi muhim ahamiyat kasb etdi. Shuningdek bir jamoa bo‘lib xamjihatlikda harakat qildik.

– Yana Sizni “Neftchi”da ko‘rib turganimizdan xursandmiz. Toshkent yig‘in qanday kechmoqda ?

– Mashg‘ulotlarga qo‘shilganimga hali ko‘p bo‘lgani yo‘q. Barchasi professioanal darajada yo‘lga qo‘yilgan. Hamma qatori tarkibdagi yangi futbolchilar ham qattiq ter to‘kib mehnat qilishmoqda. Tajribali ijrochilar ekanligini ko‘rinib turibdi.

– Ikkinchi davradan nimalar kutyapsiz ?

– Ikkinchi davrada “Neftchi”ni yuqori o‘rinlar uchun kurashishida yordam bermoqchiman. Farg‘onada futbolga bo‘lgan mehr baribir boshqacha! Muxlislar xar doim o‘z sevimli klubidan g‘alaba kutadi. Biz ham ikkinchi davradan yaxshi natijalar qayd etib, “Neftchi” muxlislarini xursand etmoqchimiz.