“Lokomotiv” jamoasi davralar oralig‘idagi tayyorgarlik jarayonini endilikda o‘z qarorgohida davom ettirmoqda.
“Temiryo‘lchilar” 28 iyulda O‘zbekiston kubogi chorak finali doirasida “Buxoro”ga qarshi javob o‘yinini o‘tkazadi. Jamoa hujumchisi Murod Bobojonov mazkur bahsga hozirlik jarayoni xususida klub matbuot xizmatiga qisqa intervyu berdi.

- Murod, “Lokomotiv” Oliy Liga ikkinchi davrasiga tayyorgarlik jarayonini qay tariqa olib bordi?
- Ikkinchi davraga tayyorgarlik jarayonini yaxshi boshladik. Yaqinda Minsk shahrida o‘quv-yig‘ini o‘tkazib qaytdik. U yerda 3 ta nazorat uchrashuvida maydonga tushdik. Bu o‘yinlarda 2 ta g‘alaba hamda 1 ta durang qayd etdik. Umuman olganda, xorij yig‘ini a’lo darajada o‘tdi. Ana endi Toshkentga qaytib ham mashg‘ulotlarni davom ettiryapmiz. Tarkibimiz ancha kuchaytirilmoqda. Qolaversa, jarohat olgan futbolchilar ham safga qayta boshlashdi. Nasib etsa, ikkinchi davrani ajoyib tarzda o‘tkazmoqchimiz.

- “Lokomotiv”ni 28 iyul kuni Kubok doirasidagi “Buxoro” bilan o‘yin kutib turibdi…
- Ushbu o‘yinga ham hozirlikni davom ettiryapmiz. Har kuni mashg‘ulotlar o‘tkazilyapti. Mashg‘ulotlar ancha rang-barang hamda qiziqarli o‘tayotganini ta’kidlashim lozim.

- Raqib jamoa o‘yini ham tahlil etilmoqdami?
- Ha, albatta. Masalan, kuni kecha “Buxoro” bilan chorak final ilk o‘yinimizni tomosha qildik. O‘sha bahsda “Buxoro” ham ancha yaxshi o‘yin ko‘rsatgandi. Uchrashuv esa durang bilan nihoyasiga yetgan edi. Ushbu klub ham ancha shakllanganini chempionat davomida namoyish etib kelyapti. Birinchi o‘yinda ancha qiyinchilikka duch kelganimiz bejiz emas.

- “Lokomotiv” chempionat bilan birgalikda kubok bahslarida ham o‘z oldiga eng oliy maqsadni qo‘ygan bo‘lsa kerak…
- Ha, albatta! Biz faqat va faqat g‘alaba haqida o‘ylayapmiz!