G‘uzorning «Sho‘rtan» futbol klubi Edgar Gessni bosh murabbiy sifatida tanishtirdi. Klub matbuot xizmatining xabar berishicha, Gess «oq bo‘rilar» boshqaruviga munosib nomzod deb topilgan.

Bunda Gess avval ham «Sho‘rtan»da faoliyat ko‘rsatgan, g‘uzorlik muxlislar mehrini qozongan va aytish joizki, hozircha jamoa tarixidagi eng yuksak natijani qayd etgan mutaxassis sifatida tanishtirilgan.

Edgar Gess bunga qadar ham ikki bor «Sho‘rtan» bosh murabbiyi etib tayinlangan va tabiiyki, shuncha marta iste’foga chiqarilgan. Bu borada murabbiy uchinchi iste’fo sari birinchi qadamni tashladi.

U 2009—2011 va 2012—2013 yillarda «Sho‘rtan»ni boshqargan. Klubning Oliy ligadagi eng yaxshi natijasi 4-o‘rin bo‘lib, bu Edgar Gess murabbiyligida 2010 yil qo‘lga kiritilgan. O‘sha yili g‘uzorliklar O‘zbekiston kubogining finaliga qadar yetib borgan va kelasi yil OFK kubogida ishtirok etib, guruh bosqichini muvaffaqiyatli bosib o‘tgan.

«Sho‘rtan» ayni vaqtda muammolar girdobida qolgan. Serbiyalik sobiq futbolchisidan qolib ketgan qarzini bir amallab to‘lagan klub, endi belaruslik murabbiy Igor Kriushenko va u olib kelgan yordamchiga ham qarzini qaytarishi kerak. FIFA esa «Sho‘rtan»ni Birinchi ligaga tushirib yuborish talabini qo‘ygan.