Andijon viloyatida haftaning har juma kuni “Yoshlar kuni” deb e’lon qilinib, kelajagimiz bo‘lgan yoshlar o‘rtasida turli tadbirlar o‘tkazib kelinmoqda.
Kuni kecha Andijon shahri Bo‘ston dahasidagi Bolalar va o‘smirlar futbol maktabida ana shunday tadbir tashkil qilindi. Viloyatning asosiy jamoasi bo‘lgan “Andijon” klubining tajribali futbolchilari muassasada tarbiyalanayotgan yosh futbolchilar bilan uchrashib, mahorat saboqlarini berdilar. Yuz nafardan ziyod tarbiyalanuvchilar ishtirok etgan yashil maydondagi uchrashuvda “Andijon” klubi futbolchilari Anvar Berdiyev, Akmal Otaxonov, Akmal Xolmatov bolalar bilan mashg‘ulot o‘tkazishdi.
— Bunday uchrashuvlar yosh futbolchilar uchun juda kerak, — deydi futbol maktabi direktori Bekzodbek Karimov. — Mahorat darsi davomida tarbiyalanuvchilarimiz taniqli futbolchilardan maydonda to‘p bilan muomala qilish, futbol o‘yini sirlari, taktik ishlanmalarni o‘rganishdi. Yurtimizning taniqli futbolchilari bilan mana shunday uchrashuvlarni yanada ko‘proq tashkil qilsak, foydadan holi bo‘lmaydi.
Yosh futbolchilar mehmonlardan o‘zlarini qiziqtirgan savollariga javob oldilar.
Elmurod Ermatov, Andijon
