Андижон вилоятида ҳафтанинг ҳар жума куни “Ёшлар куни” деб эълон қилиниб, келажагимиз бўлган ёшлар ўртасида турли тадбирлар ўтказиб келинмоқда.

Куни кеча Андижон шаҳри Бўстон даҳасидаги Болалар ва ўсмирлар футбол мактабида ана шундай тадбир ташкил қилинди. Вилоятнинг асосий жамоаси бўлган “Андижон” клубининг тажрибали футболчилари муассасада тарбияланаётган ёш футболчилар билан учрашиб, маҳорат сабоқларини бердилар. Юз нафардан зиёд тарбияланувчилар иштирок этган яшил майдондаги учрашувда “Андижон” клуби футболчилари Анвар Бердиев, Акмал Отахонов, Акмал Холматов болалар билан машғулот ўтказишди.

— Бундай учрашувлар ёш футболчилар учун жуда керак, — дейди футбол мактаби директори Бекзодбек Каримов. — Маҳорат дарси давомида тарбияланувчиларимиз таниқли футболчилардан майдонда тўп билан муомала қилиш, футбол ўйини сирлари, тактик ишланмаларни ўрганишди. Юртимизнинг таниқли футболчилари билан мана шундай учрашувларни янада кўпроқ ташкил қилсак, фойдадан ҳоли бўлмайди.

Ёш футболчилар меҳмонлардан ўзларини қизиқтирган саволларига жавоб олдилар.

Элмурод Эрматов, Андижон