Bolgariyada bolalar va o‘smirlar o‘rtasida yirik xalqaro turnir o‘tkazilmoqda.

Byala va Obzor shaharlarida o‘tayotgan musobaqada “Bunyodkor” futbol maktabining 2006 va 2008 yillarda tavallud topgan tarbiyalanuvchilari ham ishtirok etishmoqda.

Akmal Risqullayev va Abdumalik Raximov murabbiyligidagi 2006 yillarda tavallud topgan futbolchilarimiz musobaqada ikkita – “Bunyodkor-A” va “Bunyodkor-B” jamoalari nomi ostida ishtirok etishmoqda. “Bunyodkor-A” futbolchilari birinchi turda Moskvaning “Shkola-1208” jamoasi darvozasiga javobsiz 15ta gol urishdi. “Bunyodkor-B” vakillari esa Kishinyovning “Sparta” klubidan 2:0 hisobida ustun kelishdi.

2-turda ham vakillarimiz g‘alaba qozondilar. Akmal Risqullayev boshchiligidagi “Bunyodkor-A” futbolchilari Moldovaning “Dachiya” jamoasini 6:2, Abdumalik Raximov murabbiyligidagi “Bunyodkor-B” vakillari Bolgariyaning “Roz-Dolina” jamoasini 2:1 hisobida mag‘lubiyatga uchratdi.

Uchinchi turda ham vakillarimiz yuz foizli ko‘rsatkichni qayd etishdi. “Bunyodkor-A” Varnaning “Olimpik”ini 11:1, “Bunyodkor-B” esa Sofiyaning “Ferion” jamoasini 4:2 hisobida dog‘da qoldirishdi.

2008 yilda tavallud topgan futbolchilar o‘rtasidagi musobaqada jami oltita jamoa ishtirok etmoqda. Har bir jamoa bir-birlari bilan bittadan o‘zaro o‘yin o‘tkazadi. Shundan so‘ng, eng ko‘p ochko jamg‘argan jamoa musobaqa g‘olibi deb e’lon qilinadi. “Bunyodkor” ushbu yosh toifasida ham ikkita jamoa bilan ishtirok etmoqda. Hozircha Abdujabbor Ma’rufaliyev va Furqat Samegov murabbiyligidagi futbolchilarimiz muvaffaqiyatli ishtirok etishmoqda. Dastlabki turda “Bunyodkor-A” va “Bunyodkor-B” jamoalari o‘zaro bahs olib borishdi. Unda “A” jamoa vakillari 4:0 hisobida ustun keldilar.

Ikkinchi turda “Bunyodkor-A” mezbonlar “Olimpik” jamoasini 15:0 hisobida mag‘lubiyatga uchratdi. “Bunyodkor-B” jamoasi esa Sofiyaning SSKA klubi tarbiyalanuvchilari bilan jangavor durang 3:3 hisobi qayd etishdi.