O‘zbekiston Respublikasi mustaqilligining yigirma olti yilligi munosabati bilan bir qator soha xodimlari Prezidentimiz SH.M.Mirziyoyev farmoniga ko‘ra faxriy unvonlar va ordenlar bilan taqdirlandi.

Ular orasida O‘zbekistonda ikki karra eng yaxshi murabbiy deb e’tirof etilgan “Nasaf” futbol klubi bosh murabbiyi Ro‘ziqul Berdiyev “O‘zbekiston Respublikasida xizmat ko‘rsatgan sport ustozi” faxriy unvoni bilan taqdirlandi. Biz Berdiyevni ushbu unvon bilan tabriklab, suhbatga tortdik.  

— Avvalambor muhtaram Prezidentimiz Shavkat Miromonovichga meni kamtarona mehnatimga shunday katta baho berib unvon bilan taqdirlaganlari uchun kattadan-katta tashakkurlar izhor etaman. Bu mukofot o‘zim kabi sport va futbol sohasida mehnat qilayotgan insonlarga berilgan katta e’tibor va sharaf deya, qabul qilaman. Yashirmayman, bu kutilmagan xursandchilikdan hayajondaman. Juda xursand bo‘ldim. Bu mukofot meni yanada ko‘proq mehnat qilishimga, yurtimiz sha’nini yanada yuksaklarga ko‘tarishga undaydi, ruhlantiradi. O‘zimga bildirilgan bu katta ishonchni oqlashim uchun bor kuchim va bilimimni ayamayman. O‘zbek futbolining rivojiga munosib hissa qo‘shish, men kabi murabbiylarning maqsadi va orzusidir.