Toshkentning «Paxtakor» klubi aksiyalari xorijiy investorlarga sotib yuboriladi.

O‘zbekiston Respublikasi prezidentining «Paxtakor» futbol klubining moddiy-texnik bazasini yanada takomillashtirishga doir chora-tadbirlar to‘g‘risida»gi qaroriga asosan, «PAXTAKOR» sport-mashg‘ulot o‘quv markazi» MCHJ va «PAXTAKOR TENNIS ASE» MCHJ «PAXTAKOR» futbol klubi»ga birlashtiriladi. Keyinchalik uning ustav jamg‘armasidagi 80 foiz ulush «SFI Management Group» XK MCHJga sotiladi, 20 foizi esa poytaxt hokimligida qoladi.

Shartnomaga ko‘ra, investor binolar va inshootlarni qurish, rekonstruksiya qilish, ularni xalqaro standartlar talablariga muvofiq keltirishi shart hisoblanadi. Investisiya majburiyatlarining umumiy hajmi – kamida 200 mlrd so‘m bo‘lib, ular biznes-rejalarga muvofiq 5 yil mobaynida amalga oshiriladi.

Investor faqat o‘ziga yuklatilgan majburiyatlarni to‘liq bajargandan keyin ustav jamg‘armasidagi o‘z ulushini tasarruf etish huquqiga ega bo‘ladi. Ungacha investorning sotib olgan ulushiga bo‘lgan huquqi «tasarruf etish huquqisiz» qaydi bilan mulk huquqiga sertifikat bilan tasdiqlanadi.

Shuningdek, hujjat bilan ayrim tashkiliy masalalar tartibga solingan hamda «PAXTAKOR» futbol klubi» MCHJga va u tomondan jalb qilinadigan xorijiy mutaxassislarga imtiyozlar taqdim etilgan.