O‘zbekiston terma jamoasi sardori Odil Ahmedov "Sport" telekanalining "Gol" ko‘rsatuvida mehmon bo‘ldi va ochiq fikrlar bildirdi. Jumladan yarim himoyachi Oliy ligada kelishilgan o‘yinlar ko‘p ekanini ham tan olgan.

"Oliy ligada kelishilgan o‘yinlar juda ko‘p. Bunday o‘yinlarda futbolchi 20 foiz kuch bilan o‘ynaydi. Endi shu futbolchi terma jamoaga kelgandan keyin undan nima kutish mumkin? Biz eng avvalo ichki chempionatni kuchaytirishimiz kerak. Shunda terma jamoa ham kuchayadi.

Hozir terma jamoa asosan legionerlarga suyanib qolgan. Albatta Farg‘onada yoki G‘uzorda kuchli futbolchi yetishib chiqishi mumkin, ammo xalqaro o‘yinlarda uning foydasi ko‘p bo‘lmaydi. Oliy ligani tomosha qilib boraman, ammo u yerda Maradonadek o‘ynagan o‘yinchi xalqaro uchrashuvda maydonga tushganda to‘xtab qolishini ham ko‘ryapmiz.

Agar O‘FFning yangi rahbariyati meni chaqirib, maslahat olishsa, bu gaplarni aytishga tayyorman. Ochig‘i, bo‘layotgan ishlarni ko‘rib, jonim achishadi. Biror sohaga keldingmi, pul o‘z yo‘liga, u bilan birga ishingni ham hech bo‘lmasa 30 foiz yaxshi ko‘rish kerak. Faqat pulga bog‘lanib qolsa rivojlanish qiyin bo‘ladi", - deydi Odil Ahmedov.