Oliy ligadan o‘rin olgan "Nasaf" - "Olmaliq" (1:0) o‘yinidan so‘ng, mezbonlar ustozi Ro‘ziqul Berdiyev o‘z fikrlarini aytdi.
"Bugun biz g‘alaba qozonish uchun maydonga tushgan edik. Keyingi mag‘lubiyatlardan so‘ng bugun asosiy vazifamiz ijobiy natijani qo‘lga kiritish edi. Shuning uchun bunga erishdik. Albatta bu biz uchun oson bo‘lmadi. “Olmaliq” jamoasining o‘yinini bilasizlar, ular himoyada juda tartibli o‘ynashadi. Jamoa o‘yini asosan yaxshi himoyalanib, raqibni standart vaziyatlardan jazolash asosida tashkil etiladi. Buni biz yaxshi o‘rgangan edik. Shunday vaziyatlarda yigitlar diqqat bilan o‘ynadi va xatoga yo‘l qo‘yishmadi. Umuman olganda bugun bundanda yaxshiroq o‘yin namoyish etishimiz mumkin edi. Keyingi muvaffaqiyatsizliklar orqali jamoamizda ruhiy tushkunlik va bosim paydo bo‘lgandi. O‘ylaymanki, bugungi g‘alaba yigitlarga bu ruhiy holatdan chiqib ketishiga yordam beradi" - dedi Berdiyev.
