O‘zbekiston futbol federasiyasining hisobot va saylov konferensiyasidan o‘rin olgan dastlabki masala ko‘rib chiqildi. Unda tashkilotning reviziya komissiyasi raisi G‘ulomjon Musayevning hisoboti tinglandi. Qisqa qilib aytganda, O‘FFning moliyaviy va buxgalterlik ishlari joyida. Hech qanday muammo yo‘q.

Shundan so‘ng Konferensiyada "Nasaf" bosh murabbiyi Ro‘ziqul Berdiyev so‘zga chiqdi. Ro‘ziqul Sa’dullayevich futbolimizda yutuqlar va kamchiliklar borligini ta’kidladi.

"Yurtimizda futbolni rivojlantirish uchun barcha imkoniyatlar bor. Bizning ajoyib muxlislarimiz, iqtidorli futbolchilar, kuchli murabbiylar bor. Umid qilaman, vaqti kelib O‘zbekiston Respublikasi futboli rivojlangan mamlakatga aylanadi. Mirabror Usmonov boshchiligidagi qilingan ishlar uchun minnatdorchilik bildiramiz. Federasiyada o‘zgarishlar bo‘lishi kutilmoqda. Yangi keladigan rahbariyati adolatli va samarali ishlaydi degan umiddaman", — dedi Ro‘ziqul Berdiyev.