Turkmaniston poytaxtida start oladigan Jang san’ati va yopiq inshootlardagi V Osiyo o‘yinlariga puxta tayyorgarlik ko‘rish maqsadida velosport bo‘yicha O‘zbekiston terma jamoasi 30 avgustdan 12 sentyabrga qadar Rossiyaning Omsk shahrida velosport-trek bo‘yicha o‘quv-mashg‘ulot yig‘inlarini o‘tkazdi. Yig‘in doirasida sportchilarimiz rossiyalik hamkasblari bilan o‘ziga hos turnirda ham ishtirok etishdi.

Mazkur musobaqada vatanimiz sharafini terma jamoamiz a’zolari Sergey Medvedev, Ruslan Fyodorov, Yekaterina Knebelova, Olga Jantuganova, Zokirxo‘ja Ixsanov, Shomansur Abdumannopov, Andrey Izmaylov, Semen Sevastyanov, Renata Baymetova, Alla Bezuglova, Nafosat Qoziyeva xamda Diana Adelshinova himoya qilishdi. Ayollar o‘rtasida sprint, keyrin yo‘nalishi bo‘yicha hamyurtimiz Olga Jantuganova faxrli 3-o‘rinni egallagan bo‘lsa, Yekaterina Knebelova keyrinda 2-o‘rinni qo‘lga kiritdi.

Shuningdek, ayollar o‘rtasida o‘tkazilgan jamoaviy poygada ballar hisobida Renata Baymetova 3-o‘rinni egalladi. Erkaklar o‘rtasida o‘tkazilgan jamoaviy poygada esa Ruslan Fyodorov kumush medal sohibi bo‘ldi. Ayollar o‘rtasida o‘tkazilgan jamoaviy poygada terma jamoamizning yana bir a’zosi Nafosat Qoziyeva kuchli o‘nlikdan joy oldi. Git yo‘nalishi bo‘yicha o‘tkazilgan poygada esa Olga Jantuganova 2-o‘ringa sazovor bo‘ldi.

Mazkur o‘quv-mashg‘ulot yig‘inlari sportchilarimizga Ashxobodda bo‘lib o‘tadigan nufuzli musobaqa oldidan tayyorgarlik vazifasini o‘tab berdi.