Turkmaniston poytaxtida davom etayotgan Jang san’ati va yopiq inshootlardagi V Osiyo o‘yinlari doirasida Osiyo Olimpiya Kengashining Bosh Assambleyasi bo‘lib o‘tdi.
Anjumanda so‘zga chiqqan OOK va Milliy Olimpiya qo‘mitalari Assosiasiyasi Prezidenti shayx Ahmad Al-Fahad Al-Sabox «Ashxobod 2017» o‘yinlarining yuksak saviyada tashkil etilganini ta’kidladi hamda Olimpiya shaharchasida barpo etilgan sport inshootlarini yuqori baholadi.
Osiyo va Okeaniya Milliy olimpiya qo‘mitalari vakillari o‘z mamlakatlarida sportni rivojlantirish va targ‘ib qilish borasida olib borayotgan ishlari haqida axborot berishdi.
Majlisda turli mamlakatlarda yaqin yillar mobaynida o‘tkaziladigan Osiyo o‘yinlarining taqdimoti diqqat markazida bo‘ldi. Jumladan, 2022 yili qit’aning eng nufuzli kompleks musobaqasini Xitoyning Xanchjou shahri qabul qilsa, oradan yana to‘rt yil o‘tib Osiyoning eng kuchli atletlari Yaponiyaning Nagoyya shahrida to‘planishadi.
Shuningdek, anjumanda O‘zbek milliy kurashi Indoneziya mezbonlik qiladigan 2018 yilgi Osiyo o‘yinlarining asosiy dasturiga kiritilgani rasman tasdiqlandi. Bu kurashimizning xalqaro arenalarda obro‘si oshib borayotganindan yana bir dalolat deyish mumkin.
Osiyo Olimpiya kengashi Bosh assambleyasi ishida O‘zbekiston Milliy olimpiya qo‘mitasining Bosh kotibi Oybek Kasimov boshchiligidagi mamlakatimiz delegasiyasi ham faol ishtirok etdi.
