Madridning “Real” klubi sardori Serxio Ramos Ispaniya chempionatida hakamlarning ishlarini tanqid ostiga oldi.

Eslatib o‘tamiz, “Real” La-Liganing so‘nggi tur doirasidan o‘rin olgan “Betis” jamoasiga qarshi uchrashuvda 0:1 hisobida imkoniyatni boy berib qo‘ygandi.

“...Qancha hakamlar haqida gapirsak ahvol tobora yomonlashib boraveradi. Hakamlar ishlarini hurmat qilishimiz darkor. Lekin ular doim bahsli vaziyatlarda “Real” emas, “Barselona” foydasiga ishlashmoqda.

Nega “Barselona” futbolchilari doim penalti tepaverishadi? “Real”da esa aksincha. Rosti, mavsumning boshlanishi meni bezovta bo‘lishimga sabab bo‘lmoqda”, deydi Ramos.

O‘yindan so‘ng “qirollik klubi” yarim himoyachisi Isko “Betis” nohaqlik evaziga g‘alaba qozongani haqida aytib o‘tdi.

“...Agar “Real” o‘z maydonida tezkor gol kirita olmasa, unda bezovta bo‘lishni boshlaydi. Lekin biz so‘nggi daqiqalarda kutilmagan golni o‘tkazib yubordik. Bu — nohaqlik!

“Barsa”dan 7 ochko ortda boryapmiz... Mavsum endi boshlandi, ularga hali yetib olish uchun imkoniyat bo‘ladi”, deydi Isko.

Shuningdek, “Betis”ga qarshi uchrashuvda maydonda javlon urgan braziliyalik yarimhimoyachi Kazemiro futbolchilarga oson emasligini ta’kidladi.

“Mag‘lubiyatdan ko‘ra durang yaxshiroq edi, biroq sovuqqonlikni saqlab qolishimiz kerak. Bizga ham oson emas. Yaratgan vaziyatlarimizni golga aylantira olmadik. “Betis” jamoasini tabriklashimiz kerak, ular g‘alaba uchun kurashdi va maqsadlariga yetishdi. Endi “Barselona”ga yetib olish haqida o‘ylashimiz kerak”, deydi Kazemiro.

Ma’lumot uchun, “Real” jamoasi bugun safarda “Alaves”ga qarshi maydonga tushsa, “Barselona” ham safarda “Jirona”ga qarshi bahs olib boradi.

Akmalxon Eshonxonov