Oliy liga 22-turidan o‘rin olgan «Sho‘rtan»-«Navbahor» (3:3) o‘yinidan so‘ng, mezbonlar hakamlikdan norozi bo‘lgan edi.

O‘FFning yakuniy qarori chiqqunicha turli fikrlar aytilaveradi. Ma’lumotlarga qaraganda, O‘FF ushbu mavzu bo‘yicha dushanba yoki seshanba kuni yakuniy qarorni e’lon qiladi.

Kecha «Oriat Dono» radiosidagi «Futbol+» dasturida «Sho‘rtan» matbuot kotibi Tolib Qosimov mazkur uchrashuvdagi holatlarga xolis fikr bildirishga harakat qildi.

«Uchrashuv bosh hakami Olim Tolibjonov uchrashuv natijasiga o‘z ta’siri ko‘rsatdi. 3:1 bo‘lib turgan vaziyatda Ubaydullayevning qanotdan uzatgan to‘pi «Navbahor» himoyachisining qo‘liga tegib yo‘nalishini o‘zgartirdi. Ammo penalti yo‘q. Keyinroq, Igor Taranni yiqitishdi, yana penalti yo‘q. Vaholanki, Tolibjonov ikkala vaziyatni ham aniq ko‘rib turgandi. Balki hisob 3:1 bo‘lib turganligi uchun hakam penalti bermagandir. Lekin jahon futbolida ko‘ryapmizki, qanday hisob bo‘lishidan qat’iy nazar qoida buzildimi - penalti! Hisob 3:2 bo‘layotgan vaziyatda namanganliklar jarima to‘pini amalga oshirishdi. Bu vaziyatda «Sho‘rtan»ning ikki o‘yinchisi maydonda yotgandi. Mehmonlar «fair-play»ga amal qilishmadi. 9 kishi bo‘lib himoyalangan g‘uzorliklar o‘sha vaziyatda gol o‘tkazib yuborishdi. Maydonda yotgan Obid Jo‘raboyev zudlik bilan shifoxonaga yetkazildi. Oyog‘ining payi cho‘zilib ketgan ekan. Shifokor ma’lumotnomasi ham qaydnomaga kiritildi. Yuqoridagi holatlardan kelib chiqib Olim Tolibjonovga past baho qo‘yilgan. O‘yin tugagach bir soatcha muhokama bo‘ldi. Videolavhalarni ko‘rgan nazoratchi haqiqatdan ham bosh hakam xatolarga yo‘l qo‘yganiga amin bo‘lgach, unga «2» baho qo‘ydi», - deydi «Sho‘rtan» matbuot kotibi.