Avvalroq, o‘zbekistonlik professional bokschi Fazliddin G‘oyibnazarov joriy yilning 9 dekabr kuni faoliyatidagi to‘rtinchi jangidagi raqibi o‘zgarganligi haqida xabarbergandik.
Aslida rejaga ko‘ra, G‘oyibnazarovning shu kundagi raqibi rossiyalik Andrey Klimovga qarshi ringga ko‘tarilishi kerak edi. Lekin kutilmaganda 35 yoshli Klimov hamda uning jamoasi rejasini o‘zgartirib, Fazliddin bilan jang o‘tkazmasligini ma’lum qilgandi.
Ammo taniqli boks promouteri Bob Arum boshchiligidagi “Top Rank” kompaniyasi Fazliddin G‘oyibnazarovga yangi raqib topib berdi. Unga ko‘ra, Fazliddin 9 dekabr kuni amerikalik 24 yoshli bokschi Stiven Ortizga qarshi ringga ko‘tariladi.
Ma’lumot uchun, Stiven Ortiz faoliyati davomida 7 marta jang o‘tkazgan bo‘lib, ularning barchasida g‘alaba qozongan. Ikki bor raqiblarini muddatidan avval mag‘lub etgan.
Shuningdek, Ortiz so‘nggi jangini shu yilning 24 iyun kuni Tayrom Jonsga qarshi o‘tkazib, ochkolar hisobiga ko‘ra g‘alabaga erishgandi.
Fazliddin G‘oyibnazarov va Stiven Ortiz o‘rtasidagi 8 raundlik jang AQSHning Nyu-York shahrida qad rostlagan Madison Square Garden arenasida bo‘lib o‘tadi.
Tahririyatimiz barcha boks muxlislari nomidan Fazliddin G‘oyibnazarovga omad tilaydi!
Olg‘a, Fazliddin!