Joriy mavsum milliy chempionatimizda bir qator yosh futbolchilar o‘zlarini ko‘rsatishmoqda.
Jumladan, «Lokomotiv»ning iste’dodli yarim himoyachisi Azizbek Omonov «temiryo‘lchilar» safida tez-tez maydonga tushishdan tashqari, muhim gollarga mualliflik qilmoqda.
Xo‘sh, 19 yoshli hujumkor yarim himoyachi katta futbolga ilk qadamlarini qanday tashlagan? Uning millionlar o‘yinini kasb sifatida tanlashida akasi - darvozabon Asilbek Omonov nechog‘li ta’sir ko‘rsatgan?
Bugungi suhbatimiz shu haqda.
- Azizbek, avvalo, futboldagi ilk qadamlaringiz haqida gaplashsak...
- Bu o‘yinga yoshligimdan mehrim bo‘lakcha. Esimda, vaqtida ko‘chada ertayu-kech o‘rtoqlarim bilan to‘p tepib charchash nimaligini bilmasdim. Lekin uydagilar dastlab boshqa sport turini tanlashimni istashgan.
Shunday bo‘lsada, kelajagimni aynan futbol bilan bog‘lashni istab, Zarafshon shahridagi futbol to‘garagiga qatnay boshladim.
Avvaliga o‘zimdan 3 yosh katta bolalar davrasida shug‘ullandim. Keyinroq 1997 yili tug‘ilgan tarbiyalanuvchilar guruhiga qo‘shib qo‘yishdi.
- Zarafshonda aynan qaysi murabbiy qo‘l ostida shug‘ullangansiz?
- Futbolda ilk saboqlarni tajribali Viktor Pujalindan oldim. Aniqroq aytsam, uning rahbarligidagi guruhda 4 yil o‘ynadim. Bu vaqtda jamoamiz bir qator musobaqalarda muvaffaqiyatli ishtirok etdi.
Natijada 9-sinfni bitirayotgan paytim meni «Bunyodkor»ga taklif etishdi. Bunda aynan Viktor Konstantinovichning xizmatlari juda katta, albatta.
- Demak, Zarafshondan to‘g‘ri «Bunyodkor» akademiyasiga yo‘l olgansiz.
- Ha, shunday. 9-sinfni tamomlagach, «Bunyodkor» akademiyasiga ko‘chib o‘tdim va dastlab AbdumajidToirov hamda Dmitriy Kim qo‘l ostida shug‘ullandim.
Ulardan ko‘p narsa o‘rgandim. Aytgancha, ayni payt oliy liga jamoalarida o‘ynay boshlashgan Islom Qobilov, Sanjar Qodirqulov, Javohir Esonqulov kabi yigitlar bilan bitta yosh toifasida tahsil olganmiz.
Akademiyadagi mashg‘ulotlar barobarida keyinchalik birinchi liga o‘yinlarda maydonga tusha boshladik. Xususan, jamoamiz tayyorlov guruhlari musobaqasida ancha muvaffaqiyatli ishtirok etgandi.
- Lekin «Bunyodkor»dagi sarguzashtlaringiz uncha uzoqqa cho‘zilmadi...
