Italiyalik murabbiylar jahonda o‘z obro‘lariga egalar. Arrigo Sakki, Marchello Lippi, Fabio Kapello va Jovanni Trapattoni kabi mutaxassislar o‘z falsafalari, g‘alabalari bilan futbol tarixidan joy olishgan.
Bugungi kunda ham muvaffaqiyat qozonayotgan italiyaliklar ko‘pchilikni tashkil qiladi. Xususan, Antonio Konte va Massimiliano Allegri Zayniddin Zidan bilan birga 2017 yilning eng yaxshi murabbiyi bo‘lish uchun da’vogarlik qilishmoqda.
Shunday mutaxassislardan yana biri Klaudio Ranyeridir. 2016 yilda aynan u FIFA talqiniga ko‘ra jahonning eng yaxshi murabbiyiga aylangan.
Unchalik kuchli tarkibga ega bo‘lmagan «Lester» ustozi sifatida Angliya chempionligini qo‘lga kiritgan Ranyeri ayni paytda «Nant» bilan Fransiya chempionatida mo‘’jiza yaratmoqda.
Liga 1da 4-o‘rinda borayotgan «Nant» oxirgi 19 yildagi eng yaxshi startini namoyish qildi. FIFA rasmiy sayti 2017 yilgi eng yaxshi murabbiy aniqlanishidan oldin 2016 yilgi laureat bilan suhbatlashdi.
- Siz o‘tgan yili FIFAning eng yaxshi murabbiyi bo‘ldingiz. Bu mukofot erishgan natijalaringiz bilan taqqoslaganda, qanchalik ahamiyat kasb etadi?
- Ushbu mukofotni qo‘lga kiritganimdan faxrlanaman. Mazkur sovrin Lester shahri va mening muvaffaqiyatlarim davomidir. U yuragimdan joy oldi.
- Bu yil eng yaxshi bo‘lish uchun Zayniddin Zidan, Antonio Konte va Massimiliano Allegrilar kurash olib borishmoqda. Ulardan qay biri bosh sovrinni qo‘lga kiritadi?
- Birortasini alohida ko‘rsata olmayman. Chunki ularning har biri ajoyib murabbiylardir. Umid qilamanki, mukofotga munosib inson g‘olib chiqadi. Italiyalik mutaxassislar yuqori natijalarni qayd eta olishlarini ko‘rsatdilar.
Konte «Chelsi» bilan Angliya chempioni bo‘ldi, Allegri esa Italiyada «Yuventus»ni cho‘qqiga olib chiqdi.
Shuningdek, Chempionlar Ligasida ham iqtidorini namoyish qildi. Yuqorida aytganimdek, nomzodlarning barchasi yilning eng yaxshi murabbiyi bo‘lish uchun munosibdir.
- Nima uchun Konte va Allegriga qoyil qolasiz?
