Birinchi liga karvoni asta-sekin oxirlab bormoqda. Bu yil birinchi liga yangi kashfiyotlarni taqdim etmoqda. Turnirda o‘z to‘purarlik qobiliyatini ko‘rsatayotgan "Mash’al-2" jamoasi xujumchisi Shahzod Ubaydullayev shular jumlasidandir va shu munosat bilan Shahzodni suxbatga tortdik.
Salom Shahzod. Suxbatimiz avvalida oilangiz haqida ikki og‘iz ma’lumot bersangiz.
- Men 1998 yilning 2 mart kuni Namangan viloyati Kosonsoy tumanida tavallud topganman. Oilada olti kishimiz dadam, ayam, akam, va ikkita singlim bor. Oilada ikkinchi farzandman.
Futbol olamiga kirib kelishingizga kim sababchi bo‘lgan?
- Futbolga kelishimga dadam sababchi bo‘lganlar chunki ularning o‘zlari ham futbolchi bo‘lganlar. Dadamning ismlari Umidjon Jo‘rayev. Dadam bir qancha Oliy va birinchi laga klublarida to‘psurganlar masalan 1996-1999 yillari «Kosonsoy», 2000-2001 “Qizilqum”, 2001-2002 «Andijon», 2003 yili «Metallurg», 2003-2004 «Mash’al», 2005 yili “Sho‘rtan” jamoalarida o‘ynagan.
Sizga futbol sir-asrorlarini o‘rgatgan birinchi murabbiyiz kim?
- Mening birinchi murabbiyim Umarxon Ataxonovdir.
Futbol bilan qachondan shug‘ullanasiz va dastlabki to‘p surgan jamoangiz?
- Futbol bilan 6 yoshimdan boshlab shug‘ullanib kelmoqdaman. 2015-2016 yillari Namanganning «Kosonsoy» jamoasida to‘p surganman
Mening birinchi Professional shartnomam 2016 yil 1 avgust kuni Muborakning «Mash’al» jamoasi bilan bo‘lgan.
«Mash’al»ga qanday kelib qolgansiz?
- «Mash’al»ga kelishimga sabab Dilyaver aka Vaniyev bo‘lganlar. Ular meni «Mash’al» futbol klubida «yosh futbolchilarga e’tibor kuchli, sen o‘zingni ko‘rsatsang, seni oliy liga jamoasiga o‘tishing oson bo‘ladi» deb aytganlar va men ikkilanmasdan «Mash’al» tanlaganman.
«Mash’al-2»da ajoyib statistikani qayd etayapsiz...
- Hozirgacha birinchi ligada gollarim sonini 25 ta bo‘lib turibdi. Bundan tashqari yoshlar ligasida ham to‘p suraman.Hozirgacha yoshlar ligasi doirasida 5 ta to‘p kiritganman. Albatta bu gollar mening jamoadoshlarim sayi harakati bilan urilgan va men ularga o‘z minnatdorchiligimni bildirmoqchiman.
Keyingi rejalaringiz.
- Men 2018 yilda «Mash’al» ning Oliy liga jamoasida o‘ynamoqchiman…
