Qatar Yulduzlar Ligasida faoliyatini davom ettirayotgan o‘zbekistonlik hujumchi Temurxo‘ja Abduxoliqov 6-turda dublga erishdi.
U to‘p suradigan «As-Sayliya» klubi autsayder maqomidagi «Qatar SK» maydoniga safar etib, yirik g‘alabaga erishdi. Abduxoliqov hisob ochuvchi golga mualliflik qilgan bo‘lsa, 2-taymda penaltini aniq amalga oshirishga muvaffaq bo‘ldi.
6 ta o‘yinning barchasida maydonga tushgan Abduxoliqov 6 ta gol urishga muvaffaq bo‘ldi. Shularning 2 tasi penalti mahsulidir. Qatar Yulduzlar Ligasida 11 ta goli bor Al-Arabiy to‘purar bo‘lib turibdi. Abduxoliqov esa undan keyin ikkinchidir.
Mazkur turda yana bir o‘zbekistonlik futbolchi — Sanjar Tursunovning «Al-Xaraytiyat» klubi 0:0 hisobida durang o‘ynadi. Ayni paytda «As-Sayliya» 5-o‘rinni egallab turgan bo‘lsa, «Al-Xaraytiyat» 7-o‘ringa joylashgan. Ligada Sardor Rashidovning sobiq jamoasi, o‘tgan mavsum yakunlariga ko‘ra, 2 ta klubning birlashishidan hosil bo‘lgan «Al-Duhayl» peshqadamlik qilmoqda.
Qatar Yulduzdar Ligasi, 6-tur bellashuvlari
28 oktyabr, shanba
«Qatar SK» — «As-Sayliya» 1:5
Gollar: Temurxo‘ja Abduxoliqov, 14 (0:1). Vagner Ribeyro, 23 (0:2). Valentin Lazar, 45 (0:3). Temurxo‘ja Abduxoliqov, 49-pen (0:4). Valentin Lazar, 62 (0:5). Maykl Babatunde, 90 (1:5).
«Al-Markiya» — «Al-Xaraytiyat» 0:0
