Ayni paytgacha Ronaldu va Messining taqqoslanishi o‘lmas mavzuga aylanib kelgan. Bundan keyin ham, hatto ular faoliyatini tugatganidan so‘ng ham bu ikkala afsonani taqqoslash to‘xtamasa kerak. Shu o‘rinda bir fikrni ilgari surmoqchimiz, Ronaldu Messidan yoki Messi Ronaldudan kuchli deb aytib bo‘lmaydi. Buning sabablariga hozir to‘xtalib o‘tamiz.
RONALDU MESSIDAN KUCHLI EMAS
Ronaldu Messidan kuchli emas. To‘g‘ri, u ba’zida Messidan ko‘p gol uradi, terma jamoa safida Messidan omadli harakat qiladi, biroq bular vaqtinchalik nisbiy tushunchalar. Ya’ni bu umumiy xulosa chiqarish uchun yetarli bo‘lmaydi. Ronaldu Messidan kuchli emasligiga sabab u Messining driblinglarini takrorlay olmaydi. Shaxsan men Ronalduning Messi kabi besh-oltita futbolchini aldab kelib gol urganini ko‘rmaganman. Bu bilan Ronalduda dribling yo‘q demoqchi emasman, aslo. Faqat Messining driblingi, Messidagi aldash iqtidori ham mashg‘ulot natijasi, ham tug‘ma iqtidor. Messida bu cho‘qqiga chiqib bo‘lgan. Ronalduda esa o‘ziga yetarli darajada bor, xolos.