13-18 noyabr kunlari Rossiya poytaxti Moskva shahrida K.I.Beskov xotirasiga bag‘ishlangan XII xalqaro musobaqa bo‘lib o‘tdi.

Moziyning ajoyib futbolchisi va murabbiyi bo‘lmish Konstantin Ivanovich Beskov xotirasiga bag‘ishlab o‘tkazilgan musobaqada 2004 yilda tavallud topgan futbolchilardan iborat sakkizta jamoa ishtirok etdi. Unda “Spartak”, “Dinamo”, “Lokomotiv” va SSKA (barchasi – Moskva), “Anji” (Mahachqal’al), “Kuban” (Krasnodar), “Bunyodkor” (Toshkent) hamda Yegoryevsk viloyati futbol maktabi tarbiyalanuvchilari ishtirok etishdi.

Otabek G‘ulomxo‘jayev va Mirkamol Qosimov boshchiligidagi “Bunyodkor” tarbiyalanuvchilari birinchi turda “Lokomotiv” futbolchilariga 1:2 hisobida imkoniyatni boy berib qo‘yishdi. Ikkinchi bahsda o‘smirlarimiz SSKA futbol maktabidagi tengqurlari bilan jangavor durang qayd etishdi – 2:2. Vakillarimiz guruhning so‘nggi o‘yinida Yegoryevsk viloyati futbol maktabi tarbiyalanuvchilaridan 2:1 hisobida ustun kelishdi va ikkinchi o‘rin bilan yarim finalga yo‘llanma olishdi.

Final yo‘llanmasi uchun “Bunyodkor-2004” vakillari Moskva spartakchilari bilan kuch sinashishdi. Qiziqarli kechgan bahsning asosiy vaqtida hisob ochilmadi. Penaltilar seriyasida esa omad mezbonlarga kulib boqdi – 5:6.

Uchinchi o‘rin uchun kechgan o‘yinda “Bunyodkor” guruh bosqichidagi raqibi “Lokomotiv” bilan bellashdi. Bu safar Otabek G‘ulomxo‘jayev va Mirkamol Qosimov shogirdlari raqiblaridan revansh olishni uddasidan chiqishdi – 4:3.

Shu tariqa, “Bunyodkor” futbol maktabining 2004 yilda tavallud topgan tarbiyalanuvchilari K.I.Beskov xotirasiga bag‘ishlab Moskvada o‘tkazilgan XIII xalqaro musobaqaning bronza medallarini qo‘lga kiritdi.