2017 yil ham oxirlab bormoqda. Xo‘sh ortda qolayotgan yilda dunyo futbolining ikki yulduzi Ronaldu va Messi qanday natijalarga erishishdi? Quyidagi maqolada bunga to‘xtalib o‘tamiz.
Messi "Barselona"da: 54 o‘yin - 48 gol + 14 pas
Ortda qolayotgan yilda Leo Kataloniyaliklar uchun hozircha 48 ta gol urishga muvaffaq bo‘ldi. Argentinalik Ispaniya chempionatida ancha sermahsul yilni o‘tkazgan bo‘lsa ham, Chempionlar ligasida yil davomida atigi 4 ta gol urdi. Bu yil Messi "Oltin butsa"ni qo‘lga kiritganini alohida ta’kidlab o‘tmoq joiz. Lionel 8 marta 11 metrlik "nuqta" oldiga kelib, 6 marta darvozani aniq nishonga ola bildi va 2 marta "xet-trik"ka erishdi.
Ronaldu "Real"da: 46 o‘yin - 40 gol + 9 pas
Ronaldu "Real" tarkibida urgan gollari soni 40 taga yetdi. Krishtianu ana shu gollarning 19 tasini Chempionlar ligasida kiritgani tahsinga sazovordir. Portugaliyalik o‘tgan mavsumda Chempionlar ligasi to‘purari bo‘lgan bo‘lsa, bu mavsumda ham hozircha to‘purarlik qilmoqda. U 6 marta penalti tepdi va 2 tasida ashadi. CHLda "Bavariya" va "Atletiko" bilan o‘yinlarda uchtadan gol urishga muvaffaq bo‘ldi.
Messi Argentinada: 7 o‘yin - 4 gol
Messi terma jamoada dastlabki 6 o‘yinda faqatgina bitta gol urdi. Biroq JCH saralashining so‘ngi o‘yinida uchta gol urib, termasining mundialga chiqishini ta’minlab berdi. U terma jamoada bittagina penalti tepib va uni golga aylantirgan. E’tiborli jihati Lionel termada golli pas bermadi.
Ronaldu Portugaliyada: 11 o‘yin - 11 gol + 4 pas
Krish uchun termadagi faoliyat ancha sermahsul kechdi. U 11 ta uchrashuvda maydonga tushib, 11 ta gol urib 4 ta golli uzatmani amalga oshirdi. Jahon chempionati saralash bosqichida bir marta "xet-trik" va bir marta "poker" qayd etdi. Ikki marta penalti tepish huquqiga ega bo‘ldi va har ikkisidan ham unumli foydalandi. Ronaldu ham Messi singari termasini jahon chempionatiga chiqishida muhim rol o‘ynadi.
