Toshkent shahridagi har bir tumanda joylashgan maktab va maktabgacha ta’lim muassasalarida hamda imkoniyati cheklangan bolalar bilan ishlash internatlaridagi tarbiyalanuvchilarni yangi yil bilan tabriklash va ularga O‘zbekiston Respublikasi Prezidenti sovg‘alarini topshirish maqsadida, joriy yilning 25 dekabridan boshlab “Kelajak umidlari” tadbiri boshlangani haqida avval xabar berib o‘tgandik.
Bugungi tadbirda O‘zbekiston futbol federasiyasi mas’ullari bilan birgalikda milliy chempionatimiz klublarining ayollar jamoalari futbolchilari poytaxtimizdagi maktabgacha ta’lim muassasalari hamda maktablarga tashrif buyurib, u yerdagi bolajonlarga O‘zbekiston Respublikasi Prezidenti sovg‘alarini topshirishdi.
Shuningdek, "Kelajak umidlari" tadbiri doirasida bugun O‘zbekiston U-23 terma jamoasi a’zolari va murabbiylari poytaxtimizdagi 23-sonli Mehribonlik uyiga tashrif buyurib, u yerdagi bolalar bilan uchrashishdi hamda ularga sovg‘a-salomlar topshirishdi.
Bu loyiha yil davomida butun respublika bo‘ylab davom etadi. Respublikamizdagi ta’lim muassasalarida tahsil olayotgan bolalar muntazam ravishda mana shunday musobaqalarga jalb qilinib, ularga sovg‘alar ulashib boriladi.
