Futzal bo‘yicha O‘zbekiston terma jamoasi Toshkentda o‘quv-mashg‘ulot yig‘inini o‘tkazayotgani haqida avvad xabar berib o‘tgandik. Bugun o‘quv-mashg‘ulot yig‘ini o‘z yakuniga yetdi.
Terma jamoa bosh murabbiyi Bahodir Ahmedov o‘tkazilgan yig‘in va kelgusi rejalar haqida o‘z fikrlarini bildirib o‘tdi:
“Hukumatimiz rahbariyati tomonidan yurtimizda sportni ommaviylashtirish, sog‘lom turmush tarzini targ‘ib qilish, xususan, o‘zbek futbolini yuqori saviyaga olib chiqishga katta e’tibor qaratilayotganini alohida ta’kidlash kerak. O‘z o‘rnida O‘zbekiston futbol federasiyasi prezidenti tomonidan ham futzalni rivojlantirish, futzal bo‘yicha terma jamoalarimizning o‘quv-mashg‘ulotlarini yuqori saviyada o‘tkazish uchun barcha shart-sharoitlar yaratib berilayotgani ham qayd etib o‘tish zarur.
Oldimizda katta musobaqa – futzal bo‘yicha Osiyo chempionati turibdi. Mana shu musobaqada munosib ishtirok etib, yurtimiz nomini xalqaro maydonlarda yanada yuqoriga ko‘tarish uchun tayyorgarlikni boshlab yuborganmiz.
18 dekabrdan 28 dekabrga qadar 10 kun davomida Toshkentda o‘quv-mashg‘ulot yig‘inini o‘tkazdik. Yig‘inda terma jamoaga nomzod bo‘lgan jami 18 nafar futzalchilar ishtirok etishdi. Kuniga ikki mahaldan mashg‘ulotlar olib bordik. Yig‘in davomida asosiy e’tiborni yosh futzalchilarni sinovdan o‘tkazib olishga qaratdik. Jumladan, bu safargi o‘quv-mashg‘ulot yig‘iniga tajribali futzalchilar bilan bir qatorda Akbar Usmonov, Botir Rizayev, Husniddin Nishonov, Ixtiyor Ropiyev, Anasxon Rahmatov kabi yoshlar ham jalb qilindi.
Yanvar oyida yana ikkita yig‘in o‘tkazishni rejalashtirganmiz. Dastlabki mashg‘ulotlar Toshkentda o‘tadi. Keyin esa xorijda yana o‘quv-mashg‘ulot yig‘inlari va o‘rtoqlik o‘yinlari o‘tkazishni rejalashtirganmiz. Xorijdagi yig‘inni o‘tkazib, Osiyo Chempionatida ishtirok etish uchun Xitoy Taypeyiga uchamiz.
Xabaringiz bor, guruhimizdan Yaponiya, Janubiy Koreya va Tojikiston terma jamoalari joy olgan. Anchagina kuchli guruh. Shunga qaramay, bo‘lajak Osiyo chempionatida munosib ishtirok etib, yuqori natijalarni qo‘lga kiritishni maqsad qilganmiz”, - deydi Bahodir Ahmedov.
