Bugun yurtimizdagi bir qator sportga ixtisoslashtirilgan sayt va ijtimoiy tarmoqlarda “Neftchi” klubining tarqatib yuborilishi yoki klubning bosh homiysi FNQIZ jamoa xodimlarini ishdan olgani haqidagi xabarlar tarqaldi. “Neftchi” klubi mazkur ma’lumotlarni to‘liq asossiz deya baholaydi.

Haqiqat ham 29 dekabr kuni Qirgulidagi qarorgohda FNQIZ va klub xodimlari o‘rtasidagi uchrashuv bo‘lib o‘tdi. Unda zavod rahbariyati birinchi o‘rinda jamoa vakillarini kirib kelayotgan Yangi yil bayrami bilan samimiy tabriklab, “Neftchi” jamoasiga 2018 yilgi mavsumda omad va zafarlar yor bo‘lishini tiladi.

Shundan so‘ng kun tartibidagi ikkinchi masalaga to‘xtalib o‘tildi. Ya’ni yanvar oyidan boshlab “Neftchi” klubida yangi shtat setkasi ishlab chiqiladi. Shu sababli, bugungi kunga qadar jamoada mehnat qilib kelgan barcha ishchi-xodimlar FNQIZ ixtiyoriga o‘tkazildi. Ular mehnat jarayonlarini zavod xodimi sifatida davom ettirishlari mumkin bo‘ladi.

“Neftchi” klubi rahbariyati yanvar oyidan boshlab yangi shtat setkasi asosida bir qator xodimlarni yana klubga qaytaradi. Jamoa futbolchilari ayni paytda ta’tilga chiqishgan. “Neftchi” futbolchilari 5 yanvardan tayyorgarlikni boshlashadi. 10 yanvargacha esa tayyorgarlikning navbatdagi bosqich rejasiga aniqlik kiritiladi.

“Neftchi” matbuot xizmati.