"Manchester Siti" Angliya premyer-ligasining 21-turida "Kristal Pelas" mehmoni bo‘lib, 0:0 hisobida durang o‘ynadi. Uchrashuvdan keyin "shaharliklar" bosh murabbiyi Pep Gvardiola o‘z fikrlarini bildirib o‘tdi.

«Raqibga munosib baho berish kerak. «Kristal Pelas» – yaxshi jamoa. Bugun biz ma’lum muammolarga duch keldik. Lekin ikkinchi bo‘limda yaxshiroq o‘ynadik. O‘yin so‘ngida Ederson biz uchun durangni qayd etdi. Balki, penalti bo‘lgandir, bu hakamning qarori.

Tez orada bizni navbatdagi bahs kutib turibdi. Ochko yo‘qotganimizdan to‘g‘ri xulosa chiqarishimiz kerak.

Jezus jiddiy jarohat oldi. Umid qilaman, u faqat 1 yoki 2 oy maydonga tusha olmaydi. Keyin esa de Bryuyne bilan omadsizlik yuz berdi. Uning jarohati qanchalik jiddiy ekanini bilmayman.

Hakamlar o‘yinchilarni himoya qilishlari kerak. «Tottenxem» va «Nyukasl»ga qarshi o‘yinlarda jarohatlardan qutulib qolgandik, ammo bugun omadimiz kelmadi.

Hakamlar futbolchilarni himoya qilishlari lozim. Angliya futbolida jismoniy tayyorgarlik qanchalik ahamiyatga ega ekanini yaxshi bilamiz. Lekin qo‘pol o‘yin tufayli klublar muhim o‘yinchilarini yo‘qotishadi. Bu gap faqat «Manchester Siti»ga tegishli emas.

Transferlar? Men hozir faqat o‘yin borasida gapiraman. Jezus va de Bryuynening jarohatlari qanchalik jiddiy ekanini aniqlab olishimiz kerak. Shundan so‘ng vaziyatni muhokama qilamiz», – dedi Gvardiola.