Mavsumga tayyorgarlikni Toshkentda boshlagan "Navbahor" a’zolari bugundan ikki mahallik mashg‘ulotlarda qatnashishadi. Mashg‘ulotlar "Paxtakor" o‘yingohining yugurish yo‘lakchasi va "Oq-tepa" klubiga qarashli maydonda o‘tkazilmoqda.

Dastlabki kungi mashg‘ulotda tarkibga Dilshod Sharofiddinovdan tashqari 2017 yilgi mavsumni "Qo‘qon-1912" jamoasida o‘tkazgan Avazbek Mamatxo‘jayevni ham qo‘shilganligini qo‘shimcha qilish joiz.  1995 yilning 4 iyun sanasida tug‘ilgan Mamatxo‘jayev himoya chizig‘ida to‘p suradi.

Ayni paytda jamoani ayrim futbolchilar tark etganligi haqida xabarlar tarqalmoqda. Shu kunga qadar jamoani rasman Nemanya Yovanovich, Doniyor Usmonov, Murod Rajabov va Said Abdujabborovlar rasman tark etishganligini aytib o‘tish joiz. “Navbahor” bilan xayrlashgan futbolchilarning keyingi faoliyatida omad tilaymiz.

Kechagi mashg‘ulotda ishtirok eta olmagan darvozabon Asilbek Amanov bugun safga qo‘shiladi. Shuningdek, serbiyalik himoyachi Darko Stanoyevich ham tez orada murabbiylar ixtiyoriga yetib keladi.

Toshkentda tashkil etilayotgan dastlabki yig‘inda nazorat o‘yinlarini o‘tkazilishi haqida avval habar berib o‘tgandik. Rejaga ko‘ra to‘rtta uchrashuv o‘tkaziladi. Dastlabki o‘yin 11 yanvar kuni "Oq-tepa" jamoasiga qarshi o‘tkaziladi. "Navbahor"ga keyingi o‘yinlarda

"Qo‘qon-1912" (14 yanvar), "Mash’al" (17 yanvar) va "Sementchi" (20 yanvar) jamoalari raqiblik qiladi.

"Navbahor" Matbuot xizmati.