Toshkent shahrida mavsumga tayyorgarlikni davom ettirayotgan jamoamiz futbolchilari , kuniga ikki mahaldan mashg‘ulot o‘tkazishmoqda.

Mashg‘ulotlarning bir mahali trenajyor zalida o‘tayotgan bo‘lsa, yana bir mahalida futbolchilar stadionda ter to‘kmoqdalar.  Jamoamiz tarkibida bir nechta futbolchilar ko‘rikdan o‘tmoqda. Davron Hoshimov, Igor Taran, darvozabon O‘tkir Yusupovlarning jamoamiz mashg‘ulotlarida ishtirok etayotganidan  xabaringiz bor. Jamoamizning yosh, umidli ximoyachisi Avazxon Mamatxo‘jayev esa kechadan Namanganning "Navbahor"  jamoasi mashg‘ulotlariga qo‘shildi. Agar Mamatxo‘jayevning harakatlari Ilhom Mo‘minjonovga ma’qul bo‘lsa, Avazxon kelgusi mavsumni Namanganliklar safida ijara asosida o‘tkazishi mumkin.

Toshkentdagi o‘quv- yig‘ini davomida jamoamiz murabbiylari 4 ta o‘rtoqlik uchrashuvini  o‘tkazishni o‘z rejalariga kiritishgan. Dastlabki nazorat o‘yini 8-yanvar kuni Muborakning "Mash’al" jamoasiga qarshi o‘tkaziladi. Bundan tashqari 14-yanvar kuni "Navbahor", 23-yanvar kuni esa "Buxoro"  jamoalariga qarshi o‘yinlar o‘tkaziladi. Shuningdek 18-yanvar kuniga ham bitta uchrashuv belgilangan bo‘lib, bu borada raqiblar bilan muzokaralar olib borilmoqda.

"Qo‘qon-1912" futbol klubining matbuot xizmati barcha nazorat o‘yinlarini ijtimoiy tarmoqlardagi sahifalari orqali siz aziz muxlislarga onlayn tarzda translyasiya qilib borishni reja qilgan.