O‘zbekiston olimpiya terma jamoasi U-23 yoshlar o‘rtasidagi Osiyo chempionati “A” guruhi 2-tur uchrashuvi doirasida Xitoyga qarshi uchrashuvga tayyogarlikni davom ettirmoqda.

Xitoyning Changjou shahrida Osiyo chempionatida ishtirok etayotgan O‘zbekiston olimpiya terma jamoasi bugun mahalliy vaqt bilan soat 15:45da Xitoyga qarshi uchrashuv oldidan o‘zining yakuniy mashg‘ulotlarini o‘tkazdi. Ayni damda, ilk uchrashuvda jarohat olgan himoyachi Akrom Komilov yakka tartibda mashg‘ulot olib bormoqda. Qolgan barcha futbolchilar esa, mashg‘ulotlarda ishtirok etishdi.

Amaliy mashg‘ulotlardan tashqari, terma jamoa futbolchilari ertalab shuningdek, nazariy bilimlarini mustahkamlash uchun mashg‘ulotlarda ishtirok etishdi. Shuningdek, raqib o‘yini, ularning kuchli va kuchsiz tomonlari video orqali tahlil qilindi. Murabbiylar shtabi ham raqib o‘yinini tahlil qilib uchrashuvga kerakli taktika va turli sxemalar bo‘yicha ish olib bormoqda.

Eslatib o‘tamiz, O‘zbekiston hamda Xitoy olimpiya terma jamoalari o‘rtasidagi uchrashuv ertaga Toshkent vaqti bilan soat 13:00da boshlanadi. Soat 16:30da esa, “A” guruhi 2-turidan o‘rin olgan Ummon hamda Qatar terma jamoalari o‘rtasidagi uchrashuv boshlanadi.