Bugun 15 yanvar kuni O‘zbekiston futbol federasiyasida bolalar va o‘smirlar hamda ommaviy futbolni rivojlantirish, malakali murabbiylar tayyorlashga bag‘ishlangan yig‘ilish bo‘lib o‘tdi.
Yig‘ilishda O‘FFning mas’ullari hamda mamlakatimizning barcha viloyatlaridan tashrif buyurgan mutaxassislar ishtirok etishdi.
Avval ma’lum qilinganidek, bu yil butun respublika bo‘ylab bolalar va o‘smirlar hamda ommaviy futbol bo‘yicha 1000ga yaqin musobaqa o‘tkazish rejalashtirilgan.
Tadbir davomida O‘FF Texnik rivojlantirish boshqarmasi tomonidan yig‘ilganlarga bolalar va o‘smirlar hamda ommaviy futbol musobaqalarini o‘tkazish tartibi hamda murabbiylarni tayyorlashning yangi tizimi bo‘yicha taqdimot qilindi hamda musobaqalar taqvimi belgilab olindi. Mutaxassislarga hududlarda bolalar va o‘smirlar futbolini rivojlantirishda, musobaqalarni o‘tkazishda ahamiyat qaratish kerak bo‘lgan muhim jihatlar haqida ko‘rsatmalar berib o‘tildi.
Bundan tashqari, joylarda bolalar va o‘smirlar futboli bo‘yicha ish olib borayotgan mutaxassislar o‘z ishiga qanchalik loyiq ekanini aniqlash, malakasini tekshirish uchun ular bilan suhbat o‘tkazildi. Shuningdek, murabbiylarni tayyorlash bo‘yicha mutaxassislarning malakasi ham sinovdan o‘tkazildi.
