Namanganning “Navbahor” jamoasi bugun Toshkentda tashkil etilayotgan o‘quv-mashg‘ulot yig‘inining dastlabki bosqichini yakunladi. Dastlabki yig‘in so‘nggida Toshkentning "Bunyodkor" jamoasiga nazorat o‘yini o‘tkazildi. "Qaldirg‘ochlar" bilan o‘tgan bahsda 2:1 hisobi qayd etildi.
"Bunyodkor"ning har ikki bo‘limda urgan bittadan goliga “Navbahor”ning yangi a’zosi Azamat Allaniyozovning aniq zarbasi bilan javob qaytardi. Allaniyozov penaltidan samarali foydalandi.
Umuman olganda “lochinlar” uchrashuvni yomon o‘tkazishmadi. Ko‘p hollarda raqibdan ustunlikka erishib, gol urish uchun imkoniyatlarga ham ega bo‘lishdi. Lekin vaziyatlardan foydalana olmaslik imkoniyatni cheklab qo‘ydi.
“Navbahor” uchrashuvni quyidagi tarkibda o‘tkazdi: Abdumavlon Abdujalilov, Jahongir Mehmonov, Darko Stanoyevich, Avazbek Mamatho‘jayev, Mirzohid G‘ofurov, Oston O‘runov, A’zam Aliyev, Dilshod Sharofiddinov, Zohir Pirimov, Azizbek Turg‘unboyev, Azamat Allaniyozov.
Zaxiradan maydonga tushganlar: Mirzohid Mamatxanov, Ilhom Boydedayev, Ravshan Hursanov, Abbos G‘ulomov, Shohzamon Hayrullayev.
Uchrashuvda kichik jarohat tufayli Dilshod Jabborov, Ayubxon No‘’monov va Yanis Lindalar ishtirok eta olishmadi. Mazkur o‘yindan so‘ng futbolchilarga qisqa muddatlik ta’til e’lon qilindi. 23 yanvar kuni “Navbahor” a’zolari Toshkentda to‘planib tayyorgarlikning navbatdagi bosqichiga kirishishadi.
“Navbahor” FK matbuot xizmati.
